Ақорданың баспасөз қызметінің хабарлауынша, тараптар Қазақстан мен Чехия арасындағы қатынастың қазіргі ахуалы мен перспективасын талқылады.
Мемлекет басшысы Радек Вондрачекті Барқыт төңкерісінің 30 жылдығымен, Чехияның НАТО-ға кіруінің 20 жылдығымен және алдағы Республика күнімен құттықтады. Сонымен бірге Президент Қазақстанның Чехиямен байланысының өзгермейтінін айтты.
Екі ел парламенті арасындағы өзара іс-қимылды нығайту тұрғысынан ғана емес, сонымен бірге екіжақты ынтымақтастыққа тың серпін беру үшін сіздің сапарыңыздың маңызы зор, — деді Қасым-Жомарт Тоқаев.
Чехия саясаткері қонақжайлық көрсетіп, жылы қабылдағаны үшін Қасым-Жомарт Тоқаевқа алғыс айтты. Сонымен бірге еліміздегі реформаларды жоғары бағалады.
Чех Республикасының өкілі ретінде елдеріміз арасында достық және дәстүрлі ынтымақтастық рухында дамып келе жатқан өте тығыз әрі терең қатынастарды растауға мүмкіндік алғаныма қуаныштымын, — деді Радек Вондрачек.