Жан құпиялары: Архетип. Невроз. Либидо
ХІХ-ХХ ғасырлардағы психоанализ, психиатрия және гипноз туралы 18 сериялы деректі цикл. Сериалдан Зигмунд Фрейдтің тұлғаның дамуы, Чезаре Ломброзоның сырт келбет теориялары, Жан-Мартен Шарконың гипнозы, Карл Юнгтің зерттеу әдісі, Альфред Адлердің адам комлексіне қатысты эсперименттері туралы білуге болады.
Ми. Сана құпиялары — The Brain. A Secret History
ВВС телеарнасының ми жұмысы мен құпиясы туралы 3 сериялы деректі циклі. Сериал белгілі бір әрекет кезіндегі сананың жұмысы, ойды бақылау мен басқару туралы эксперименттерден тұрады.
1-серия — Сананы басқару / Mind Control
2-серия — Эмоция / Emotions
3-серия — Бұзылған ми / Broken Brains
Өнердің күші — Simon Schama’s Power of Art
Ағылшын өнертанушысы Саймон Шаманың суретшілер туралы 8 сериялы деректі бағдарламасы. Автор Караваджоның жұмыстары, Рембрандттың құпия суреттері, Пикассоның қолтаңбасы, Ван Гогтың ашық бояулары туралы тартымды деректер жайлы баяндайды.
Морган Фрименмен бірге кеңістік пен уақыт арқылы — Through the Wormhole
Discovery телеарнасы шығарған ғылыми-танымдық бағдарлама. Морган Фримен сериалда ғылымның қиын сұрақтарына факт пен теория арқылы жауап іздейді. Сонымен қатар астробиология, квант механикасы, астрофизика жаңалықтары туралы әңгімелейді.
Ғаламға Стивен Хокингпен бірге — Into the Universe with Stephen Hawking
Ғылыми телесериалда Кембридж университетінің профессоры Стивен Хокингтің тұжырымдары Ұлыбританияның театр және кино актеры Бенедикт Камбербэтчтің дауысымен баяндалады. Discovery телеарнасы түсірген бағдарлама үш бөлімнен тұрады.
1-бөлім «Бөгдепланеталық» деп аталады. Мұнда Стивен Хокингтің «адамдар басқа планета мақұлығының өміріне мүлдем араласпауы қажет» деген тұжырымы айтылады.
2-бөлім ғалымның өткенге оралудың мүмкін еместігі теориясы туралы. Бірақ Стивен Хокинг болашақта жаратылыстың заңын бұза отырып, бұрынғы кезеңге қайтып келу әбден мүмкін екенін мүлдем жоққа шығармайды.
3-бөлім көрерменге әлем, жұлдыздар мен адам өмірі туралы қызық мәлімет ұсынады.
Жоғалған әлемдер — Lost Worlds
Ағылшын режиссерлары Клайв Молтби мен Мартин Кемп түсірген деректі сериал. Мұнда Ежелгі Мысыр құпияларынан бастап өткен ғасырдың 50-жылдарындағы жерасты атом бункерлеріне дейін сөз болады. Сценарий авторы — мыңнан астам деректі әрі тарихи шығарма жазған Дэн Оливер. Румыниядағы аңызға айналған Дракула қорғанына саяхат та көрерменді қызықтырмай қоймайды.
Жанкешті дегустаторлар жолға шықты — The Supersizers Go
BBC телеарнасының өнімі. Жазушы әрі мейрамхана сыншысы Джайлз Корен жазушы Сью Перкинспен бірге өткен ғасырларға шолу жасайды. Олар тарихи кезеңге сай костюм киіп, декорациялы сарайға барып тамақтанады. Франция патшайымы Мария-Антуанеттаның, Ежелгі Рим тұрғындарының, орта ғасырлар мен ХХ ғасырдағы асхана мәзірімен танысады.
