ҚР Қорғаныс министрі Нұрлан Ермекбаев Арыстан оқ-дәрі арсеналы қашан шығарылатынын айтты.
Арсеналды көшіру жөнінде Қарулы Күштердің Жоғарғы Бас қолбасшысына берілген тапсырма бар. Екі апта ішінде оқ-дәріні көшіру жұмысы басталады. Қазір дайындық жұмысы жүріп жатыр. Резервтен қаражат қарастырылған, — деді Нұрлан Ермекбаев Сенат отырысында.
Айта кетейік, бүгін Сенат отырысында 2019-2021 жылдарға арналған республикалық бюджетке енгізілетін түзетулер талқыланды.
Еске салайық, 24 маусым күні Арыстағы әскери қоймаларда бірнеше жарылыс болған еді. Оқиға салдарынан үш адам қаза тапты, 400-ден астам адам дәрігерлердің көмегіне жүгініп, 80-нен астам адам ауруханаға жатты. Қаланың 40 мыңнан астам тұрғыны эвакуацияланды. Төтенше жағдайлар қызметкерлері жарылысқа өрт қауіпсіздігін сақтамау, лауазымды тұлғалардың салғырттығы және тағы басқа жайттар себеп болуы мүмкін екенін хабарлады.
