Қытай құрамасы 107 алтын, 81 күміс, 57 қола медальмен жалпы командалық есепте көш бастап тұр. Екінші орында Ұлыбританияның спортшылары. Олар 64 алтын, 39 күміс және 44 қола жүлдеге қол жеткізсе, украиналықтар 41 алтын, 37 күміс пен 39 қола алып, үштікті аяқтады.
Қазақстан құрамасы 58-орынға аяқ тіреді. Естеріңізге сала кетейік, Паралимпиадаға Қазақстаннан 11 спортшы қатысқан еді. Олардың екеуі ел қоржынына жүлде салды. Олар Зүлфия Ғабидуллина мен Раушан Қойшыбаева. Зүлфия жүзуден алтын алса, Раушан пауэрлифтингтен күміске қол жеткізді.
Паралимпиаданың жабылу салтанатында спортшылар ирандық велошабандоз Бахман Голбарнежадты бір минуттық үнсіздікпен еске алды. Ол 17 қыркүйек күнгі жарыста апатқа ұшырап, көз жұмған еді.
Келесі Паралимпиада 2020 жылы Токиода өтеді.
