Бас мүфти Жібек жолы елдерінің рухани картасын жасауды ұсынды

Бас мүфти Жібек жолы елдерінің діни басқармалары арасында "Дін және өркениет" жобасын іске асыру қажет екенін де айтты.

Ислам конференциясы
Фото: Baq.kz

Нұр-Сұлтанда “Рухани Жібек жолы. Ислам және жастар: қазіргі заман сын-қатерлері” атты IV халықаралық ғылыми-діни конференциясында Қазақстан мұсылмандары діни басқармасының төрағасы, Бас мүфти Серікбай қажы Ораз Ұлы Жібек жолы елдерінің рухани картасын жасауды ұсынды.

Бас мүфти исламның Жібек жолы бойындағы қалаларда терең тарала бастағанын айрықша айтты.

Тарихи деректерде ислам дінінің будда, христиан діндерін, зороастризмді ығыстырып, ысырып, қанатын кеңге жайғаны айтылады. 853 жылы Тараз бен Мерке шаһарында өзге діннің (христианның) ғибадатханасы (шіркеуі) мешітке айналғаны жайлы сенімді мәліметтер кездеседі. Тарихи қалаларда үлкен мешіттердің салынуы ислам дінін ұстанатын халық санының көбеюіне байланысты. Біз, дін қызметкерлері, тарихшы-ғалымдар, зиялы қауым өкілдері тарихымыздың осы сәулелі сәттерін ұрпаққа жан-жақты насихаттай бергеніміз абзал, – деді Серікбай қажы Ораз.

Оның айтуынша, келер ұрпақ үшін Ұлы Жібек жолы елдерінің рухани картасын жасау маңызды.

Өткенсіз болашақ жоқ. Біз өткеннен өнеге алған халықпыз. Осы ретте әріптестеріме Ұлы Жібек жолы елдерінің рухани картасын жасауды ұсынамын. Рухани карта өскелең ұрпақтың тарих пен руханият саласына қатысты сұрақтарына жауап беретін бейне бір бағдаршам, шамшырақ болуы тиіс. Тарихынан тағылым алған, ал тарихи тұлғалардан тәлім көрген ұрпақ діні мен дәстүрін үйлестіріп, өнегелі өмір сабақтастығын қалыптастырмақ. Бұл бастама тарихшы ғалымдар мен дін ғұламаларының Жібек жолы тарихын ғибраттың көзімен қайта зерттеуін қажет етеді. Бұл жұмысты жүйелі жүзеге асыру үшін Жібек жолы елдерінің діни басқармалары арасында “Дін және өркениет” жобасын қолға алудың маңызы үлкен. Аталған жобалар мен ұсыныстарды талқылау үшін арнайы бірлескен жұмыс тобын құруды ұсынамын, – деді Бас мүфти.

Біздің Telegram-каналымызға жазылыңыз!