Маңғыстау облысындағы Қаламқас мұнай кен орнында тұтанған өртті ауыздықтау мүмкін болмай тұр.
«ҚазМұнайГаз» ҰК» АҚ баспасөз қызметінің хабарлауынша, қазіргі кезде өртті сөндіруге Маңғыстау облыстық төтенше жағдайлар департаменті, «Семсер — Өрт сөндіруші» ЖШС және «Файр протекшн ЛТД» ЖШС-нің 53 қызметкері және 12 техникасы жұмылдырылған.
Бірнеше рет лафеттік ұңғылардың көмегімен өртті ауыздықтауға әрекет жасалды. Бірақ өрттің ошағына тікелей кіретін жолдар болмағандықтан жалынды ауыздықтау әзірге мүмкін болмай отыр, — делінген хабарламада.
Қаламқас мұнай кен орнындағы ұңғымалардың бірінде өрт 25 наурыз күні сағат 04.40-та шыққан. Маңғыстау облыстық төтенше жағдайлар департаменті кезекші-диспетчерлік қызметіне Маңғыстау ауданындағы «МаңғыстауМұнайГаз» АҚ ұңғымасынан шыққан газ жанып, 10 метр биіктікке дейін жалын атқылап тұрғаны туралы хабарлама түскен. Өрттің ауданы — 900 шаршы метр.
Оның алдында, 13 наурызда Қаламқас кен орнында «Си Бу» инженерлік бұрғылау компаниясы» ЖШС-нің жобалық тереңдігі 903 метр болатын №8237 ұңғымасын бұрғылау барысында газ-су қоспасы атқылап, төтенше жағдай болған еді. Бұл дерек бойынша Энергетика министрлігі Мұнай-газ кешеніндегі мемлекеттік инспекцияның батыс өңіраралық басқармасы мен Маңғыстау облыстық экология департаменті «МаңғыстауМұнайГаз» АҚ-ға қатысты тексеру тағайындады.
