Нұрсұлтан Назарбаев «Нұр Отан» партиясының XVIII съезін ашты

Астанадағы Тәуелсіздік сарайында Президент Нұрсұлтан Назарбаевтың төрағалығымен «Нұр Отан» партиясының кезекті XVIII съезі жұмысын бастады.

«ҚазАқпараттың» хабарлауынша, съездің күн тәртібінде бірнеше мәселені қарастыру көзделген. Атап айтқанда, алдымен «Нұр Отан» партиясының 2030 жылға дейінгі бағдарламасы туралы мәселе қозғалады. Одан кейін партияның жарғысына өзгерістер мен толықтырулар қарастырылып, партия саяси кеңесінің жəне орталық бақылау-тексеру комиссиясының есепті кезең бойынша жұмысының қорытындысы шығарылады. Сонымен қатар партия саяси кеңесінің жəне орталық бақылау-тексеру комиссиясының мүшелері сайланады.

Съезд жұмысына 2 мыңға жуық адам қатысып жатыр. Олардың 1200-і — еліміздің барлық өңірінен келген делегат, ал қалған 800-ге жуығы — қонақ.

Айта кетейік, таяуда ҚР Президенті Нұрсұлтан Назарбаев «Нұр Отан» партиясының жақында өтетін съезінде әлеуметтік қолдауды күшейтуге және азаматтардың тұрмыс сапасын арттыруға арналған шаралар ұсынатынын айтқан еді. Оған бюджеттен және Ұлттық қордан қомақты қаржы бөлінбек. Аталған қаражат аз қамтылған азаматтарға әлеуметтік қолдау көрсету ісін күшейтуге, халықтың әлеуметтік тұрғыдан әлсіз топтарының баспана жағдайын жақсарту мүмкіндіктерін арттыруға, өңірлерді дамыту саясатын түбегейлі өзгертуге жұмсалады.

Үкімет пен барлық деңгейдегі әкімдердің жұмысы осы міндеттерді жүзеге асыруға бағытталуы тиіс. Үкімет пен өңірлердің иелігіндегі қаражат көзделген мақсатқа сай жұмсалмай отыр. Мұның бәріне бақылау орнатылады. Осы бағыттар жөнінде «Нұр Отан» партиясының съезінде толығырақ айтылады, — деді Президент.

ДереккөзInform.kz