Мектептегі өрт кезінде мұғалімдер қалай әрекет етуі керек?

Білім мекемесінде өрт бола қалған жағдайда:

• Ең әуелі сабыр сақтау керек.
• Мұрын мен ауызды сулы матамен тұмшалап, жалын мен түтін жылдам таралмауы үшін есік пен терезені жабу қажет. Көп мөлшерде су болса, кабинеттің есігі мен еденге шашқан дұрыс.
• Өрт дабылы жарияланған кезде оқушылар өз парталарының жанына тұрып, мұғалімнің нұсқауымен кабинеттен біртіндеп шығуы керек. Соңғы шыққан баладан кейін мұғалім кабинеттің есігін мықтап жабады.
• Әр класс оқушылары әбігерге түспеуі үшін бірқалыпты адыммен өз қатарында жүруі қажет. Мұғалім класс журналымен оқушылардың соңынан жүреді. Ол дәлізде немесе баспалдақпен жүрген кезде балалардан озып жүгіруіне болмайды.
• Әр мектепке жақын маңда жер сілкінісі, өрт сияқты төтенше оқиға кезінде адамдар жиналатын орын алдын ала белгіленуі керек. Өрт кезінде мұғалімдер балаларды сол жерге шығарғаны дұрыс.
• Жиналатын жерге келгенде мұғалім оқушыларды түгелдеп, оқушылардың санын бірден мектеп директорына хабарлауы қажет.
• Қызметкерлер ғимаратта қалып қойған балаларды іздестіруге кешікпей кірісуі керек. Өрттің ошағына жақындамай, балалар тығылып қалуы мүмкін басқа орындарды да қарау қажет.
• Өрт сөндірушілер келгенде мектеп директоры немесе оның орынбасарлары дереу іште қалған адамның саны мен олардың болуы мүмкін орындарын хабарлауы керек.
• Жедел жәрдем келгенге дейін түтіннен немесе жалыннан зардап шеккендерге алғашқы медициналық көмек берілуі қажет.
• Өрт cөндірушілер рұқсат бермейінше киім, кітап, құжат, тағы да басқа бағалы заттарды алу үшін жанып жатқан ғимаратқа оралуға болмайды!