Астананың мерейтойына атсалысқан шығармашылық ұжымдар мен артистер марапатталды. Оларға алғысхатты Бақыт Сұлтановтың атынан Астана әкімінің орынбасары Ермек Аманшаев пен Мәдениет және спорт басқармасының басшысы Болат Мажағұлов табыстады.
Астана әкімінің баспасөз қызметінің хабарлауынша, артистер Астананың 20 жылдығын мерекелеу үшін мамыр-қыркүйек арасында Қазақстан өңірлерін аралап, концерт қойған еді.
Барлық жерде көрермендер сіздерді қошеметпен қарсы алса, аймақ басшылары шығармашылықтарыңызға жоғары бағасын берді. Астананың қалыптасуына елеулі үлес қосып жүргендеріңізге алғыс айтамын, Сіздердің арқаларыңызда Астананың мәдениеті өте жоғары деңгейде дей аламын, — деді Ермек Аманшаев.
Гастрольдік турлар өңірлердің ірі қалалары мен Қазақстанның 14 өңірінде барлығы 40 концерт өтті.
Қазақстанның өңірлерінде Астананың 20 жылдығын мерекелеуге барынша күш салдық. Елорданың барлық шығармашылық ұжымдары, Тамара Асар, Тұрсынбек Қабатов, Клара Төленбаева, Қайрат Баекенов сынды белгілі әртістер бұл бастамамызды қолдап, уақыттарының тығыздығына қарамастан Қазақстан бойынша турнеге қатысты. Өңірлерде өткізген шараларды 100 мыңнан аса көрермен тамашалады, — деді Астана қаласы мәдениет және спорт басқармасының басшысы Болат Мажағұлов.
Артистер бас қаланың 20 жылдығын мерекелеу өздері үшін мақтаныш екенін айтты.
Бәріміз де шығармашылық жолымызды Астанадан бастадық, елордамызбен бірге өсіп-өркендедік. Осында артист атандық, мансап қуып, шаңырақ көтердік. Еліміздің бас қаласының 20 жылдығын мерекелеуге қатысу біз үшін зор мақтаныш. Осындай қысқа ғана уақыт ішінде Астана ұлы қалаға айналады деп ешкім де ойламаған. Ал қазір біз барлығының да Астанаға келіп, осында жұмыс істеуге тырысатынын көріп жүрміз, — деді «Әзіл әлемі» театрының директоры Тұрсынбек Қабатов.
