“7-20-25” бағдарламасы бойынша ай сайынғы орташа төлем көлемі белгілі болды

Қазақстандықтардың көбі 15 миллион теңгеге дейінгі сомада кредит рәсімдеген.

“7-20-25” бағдарламасы арқылы ипотека алғандардың басым көпшілігі айына 100 мың теңгеден кем төлейтін болып шықты. Бұл туралы “Баспана” ипотекалық ұйымының баспасөз қызметі хабарлады.

Мамандардың есебінше, заем алушылардың 60%-ы ай сайын 100 мың теңгеден кем сома төлейді. “7-20-25” бағдарламасы бойынша заем алушылардың 6%-ына ғана ең жоғары сома тиесілі  (Астана, Алматы, Атырау, Ақтау мен Шымкентте 20 миллион теңге, басқа аймақтарда 12 миллион теңге). Заем алушылардың қалың көпшілігі – жалпы портфельдің 37%-ы, 10-нан 15 миллион теңгеге дейінгі сомада кредит рәсімдеген.

Бағдарлама өзінің әлеуметтік бағдарын толық растады. Алайда “7-20-25” ең алдымен мерзімділік, төлем қабілеттілік және қайтарым принциптеріне негізделген ипотека екенін ұмытпауымыз керек. Ол банк алдында өзінің төлем қабілетін дәлелдеген, жұмыс істейтін қазақстандыққа қолжетімді, – деді “Баспана” ипотекалық ұйымы басқарма төрағасы Қайрат Алтынбеков.

24 қазан күнгі жағдай бойынша “7-20-25” бағдарламасы бойынша бір де бір қайтарылмаған қарыз жоқ. Қазақстандықтар 44,5 миллиард теңге сомасына өтініш берген. Банктер оның ішінен сомасы 30 миллиард теңге болатын 2513 өтінімді мақұлдаған.