Нұрсұлтан Назарбаев Дүниежүзілік сауда ұйымының бас директоры Роберту Азеведумен кездесті. Бұл туралы Ақорданың баспасөз қызметі хабарлады.
Кездесуде тараптар әлемдегі қалыптасқан жағдайға байланысты сауда-экономикалық ынтымақтастықты дамытуға қатысты пікір алмасты, сонымен бірге 2020 жылы Астанада өтетін Дүниежүзілік сауда ұйымының ХІІ Министрлер конференциясына дайындық барысын талқылады.
Сізбен Астанада қайта жүздескеніме қуаныштымын. Қазақстан Дүниежүзілік сауда ұйымына мүше болар кезде елімізге үлкен қолдау білдіргеніңізді білеміз. Бүгінде біздің ел ұйымның белсенді мүшесі саналады. 2020 жылы Астанада конференция өткізу жөнінде шешім қабылданды. Біз осы шараны тиісті деңгейде өткізу үшін күш жұмылдырамыз, – деді Президент.
Нұрсұлтан Назарбаев Дүниежүзілік сауда ұйымының елдер арасындағы сауда-экономикалық қарым-қатынастарды нығайтуды және кеңейтуді көздейтін басты қағидаттарын Қазақстанның толық қолдайтынын айтты.
Роберту Азеведу Нұрсұлтан Назарбаевқа қонақжайлық танытқаны және Қазақстан мен Дүниежүзілік сауда ұйымының алдағы ынтымақтастығына арналған мәселелерді талқылауға мүмкіндік бергені үшін алғыс білдірді.
Женевадағы соңғы кездесуімізден кейін Қазақстан мен Дүниежүзілік сауда ұйымы арасындағы ынтымақтастықтың тереңдегенін нық сеніммен айта аламыз. Сіздің еліңіз көпжақты сауда жүйесін дамыту қағидаттарын әрдайым берік ұстанып келеді. Біз Қазақстанның 2020 жылы Министрлер конференциясын өткізуге келісім бергеніне қуаныштымыз. Бұл бүгінгі әлемде болып жатқан оқиғаларға орай ерекше маңызға ие болып отыр, — деді Дүниежүзілік сауда ұйымының бас директоры.
Роберту Азеведу жетекші державалар арасындағы сауда-экономикалық шиеленістің басқа елдерге тигізетін салдарына да тоқталды.