«Астана-Аренада» өткен кездесу 2:2 есебімен тең аяқталды.

Есепті алғаш болып алаң иелері ашты. 19-шы минутта Джуниор Кабананга сол қапталдан айып алаңына қарай керемет пас асырған болатын. Допқа басын тосқан ганалық шабуылшы Патрик Твумаси ташама голдың авторы атанды.

31-ші минутта португалиялықтар ойын тәртібін бұзып, өз қақпаларына айып соққысын белгіленуіне жағдай жасады. Нүктеге жақындаған Фокси Кетевоама Джулио Сезар қорғаған қақпаға қарай пас аралас соққы бағыттады. Допқа жолай арқасын тосқан Марин Аничич есепті еселей түсті.

Алғашқы таймның аяқталуына бес минут уақыт қалғанда, таблодағы көрсеткішке өзгеріс енді. Жонас оң қапталда еркін сытылып шығып, Рауль Хименеске пасты қолмен қойғандай естіп берді. Мексикалық шабуылшы өз кезегінде, бұл мүмкіндікті мүлт жібермеді.

70-ші минутта Жонас және Хименес жұбы таразы басын теңестіріп кетті. Дмитрий Шомкодан айласын асыра білген Жонас мексикалыққа айып алаңына ене берісте құйтұрқы пас берді. Хименес тепкен доп қақпа бағанасына тиіп, ішке еніп кетті. Ненад Эрич бұл жерде еш нәрсе істей алмады. Қорытынды есеп — 2:2.

Осылайша, «Астана» өз тобында 3 ұпаймен соңғы орында келеді. Ал, 10 ұпай жинаған «Бенфика» 1/8 финалдық кезеңді толықтай шешіп қойды.

Футбол. УЕФА Чемпиондар Лигасы. Топтық кезең. 5-ші тур.

«Астана» (Қазақстан) — «Бенфика» (Португалия) 2:2 (2:1)

Голдар: Твумаси 19 (1:0), Аничич 31 (2:0) — Хименес 40, 70 (2:2)

25.11.2015. Астана, «Астана-Арена».

Пікір қосу

Қалдыратын пікіріңізді осында жазыңыз!
Есіміңізді жазыңыз!