Астанада Мемлекет басшысы Нұрсұлтан Назарбаев «Бейбітшілік қабырғасы» монументінің ашылу салтанатына қатысты. Монумент Ақтөбе облысының Астананың 20 жылдығына арналған тартуы болып отыр.
Салтанатты шараға дипломатиялық миссия жетекшілері, көрнекті мемлекет және қоғам қайраткерлері, Парламент депутаттары, зиялы қауым өкілдері, Ақтөбе облысының делегациясы, сонымен бірге Астанаға келген Ядролық сынақтарға жалпыға бірдей тыйым салу туралы шарт ұйымы мүшелері қатысты. Ақтөбеліктердің бірегей тартуы Тәуелсіздік алаңының көрнекті тұсына, «Қазақ елі» монументіне жақын жерде салынған. Жоба негізіне Президенттің «Әлем. ХХІ ғасыр» антиядролық манифестінің идеясы енгізілген, сондықтан нысан дәл 29 тамыз — халықаралық ядролық сынақтарға қарсы әрекет күнінде ашылып отыр.
Осыдан тура 27 жыл бұрын Президент Жарлығымен Семей ядролық сынақ алаңы жабылған болатын. Бұл — әлемдегі ең ірі ядролық қаруы бар елдің бірінің одан бас тарту процесінің басталуы. Сәулетшілердің айтуынша, қабырға біртұтас біріктіріп, қорғап тұратын жапырақ тәріздес шатырды бейнелейді, яғни, дәстүрлі түрік құрылтайының өнегесімен ұлттарды ұйыстырып, оларды бір шаңырақтың астына жинайды. Металл мен табиғи тастан тұрғызылған кешен үш бөліктен тұрады. Бірінші бөлігі — бөлшектеу мен оқшаулауды, екінші бөлігі — үміт, еркіндік пен тәуелсіздікті, үшіншісі бейбітшілік пен ұлтаралық келісімді сақтау жолын бейнелейді. Монументтің жалпы ұзындығы — 111 метр, ені — 18,4 метр, биіктігі 17,5 метр. «Бейбітшілік қабырғасының» тұрқы төзімді әрі берік темірден жасалған. Монументті тұрғызуға жалпы аумағы 6 мың текше метр болатын 1200 тонна гранит пайдаланылады. Мемориалда әлемнің 51 тілінде «Бейбітшілік» деген сөз жазылған.
Авторлар жобаның көрнекті мазмұнға ғана емес, оның функционалдығына да жіті мән берген. Аспалы шатырдың ашық панельдері 2,5 миллион жарық нүктесі бар 616 текше метрді алып жатқан LED-жүйеге ие. Ол кез келген үлкен көлемдегі сандық дүниені таратуға мүмкіндік береді. Экранға шығару еуропалық өнім өндірушілердің ең соңғы үлгідегі видео, аудио және коммутациялық жабдықтар орнатылған серверлік бөлмелерде жүзеге асырылады. Сол себепті бұл таңғажайып арт-нысан саяси, мәдени-бұқаралық, ақпараттық шараларды, лазерлік және басқа шоуларды өткізетін тамаша орынға айналмақ. Құны 1,8 миллиард теңге тұратын «Бейбітшілік қабырғасы» Ақтөбе облысы аумағында жұмыс істейтін компаниялар мен кәсіпкерлердің қаржысына салынғанын айта кеткен жөн. Олардың қатарына ERG, «ҚазМұнайГаз», BI Group, «Ақтөбесәулет» ЖШС, «Астана-Дорстрой» ЖШС, «БабекҚұрылыс» ЖШС және тағы басқалары бар.
