Үздік заңгерлер 1 миллион теңге сыйақы алды

Бүгін Астанада "Үздік жас заңгер-2018" байқауының жеңімпаздары марапатталды.

Марапат заңгерлер
Фото: Inform.kz

Жас мамандар “Конституция: құқық үстемдігінің, азаматтық қоғам мен заманауи мемлекеттің құндылықтарын іске асыру” халықаралық конференциясы аясында марапатталды.

Ата Заңымыз өзінің өміршеңдігін көрсетіп отыр. Конституция күні бүкіл Қазақстан халқы үшін үлкен мереке. Конституция – егемен Қазақстанның берік іргетасы, азаттығымыздың айшықты айғағы, құндылықтарды ұлықтаған елдігіміздің киелі кітабына айналған қастерлі құжат. Қасым ханның қасқа жолынан, Есім ханның ескі жолынан, әз Тәукенің “Жеті жарғысынан” бастау алып, жалпы демократиялық принциптерге негізделген Ата Заңымызға биыл 23 жыл толып отыр. Сіздерді алда келе жатқан Қазақстан Республикасы Конституциясы күнімен құттықтаймын,

– деді ҚР Конституциялық Кеңесінің төрағасы Қайрат Мәми.

Байқауға 106 өтінім келіп түскен. Қатысушыларды іріктеуді ҚР Тұңғыш Президенті – Елбасы қоры атқарушы директорының орынбасары Игорь Роговтың төрағалығымен қазылар алқасы жүзеге асырды. Қатысушылардың арасында соттар мен прокуратуралардың өкілдері, квазимемлекеттік сектордың қызметкерлері, орталық атқарушы органдар құрылымдарының мамандары, ішкі істер бөлімдерінің қызметкерлері, сот сарапшылары, адвокаттар мен ЖОО-лардың оқытушы құрамы өкілдері бар.

Байқау нәтижесі бойынша, “Заң шығарушылық қызметіне қатысу” аталымында бірінші орынды Сәуле Мектепбаева иеленді. “Заң ғылымдарына қосқан үлесі үшін” аталымы бойынша Муслим Хасенов үздік деп танылса, “Құқықтық білім беру және ағартушылық” аталымында Мирас Дауленов бірінші орын алды. Жеңімпаздарға 1 миллион теңге ақшалай сыйақы берілді.