Алматы әкімі Бауыржан Байбек қаладағы студент жастарға арналған жаңа жатақханалардың құрылысын тексеріп шықты.
Қала әкімінің баспасөз қызметінің хабарлауынша, биылғы көктемде Нұрсұлтан Назарбаев «Президенттің бес әлеуметтік бастамасын» атай отырып, студенттерге арналған жатақхана жетіспеушілігі мәселесін шешуді тапсырған болатын. Еліміздегі барлық жоғарғы оқу орнының үштен бірі орналасқан Алматыда 22 мыңнан асатын студент жатақхананы қажет етеді.
Сол себепті соңғы үш жылда Алматыда 37 жаңа жатақхана салу жоспарланып отыр. Бүгінде жеті жатақхананың құрылысы жүріп жатыр, төртеуі осы жылдың аяғына дейін пайдалануға берілмек.
Тағы 12 жоғарғы оқу орнында 4,8 мың орындық жатақхана құрылысы үшін учаске анықталды. Сонымен бірге қалада тағы 19 жатақхана салу үшін жер беріліп отыр.
Бауыржан Байбек жұмыс сапары барысында Бостандық ауданында салынған 400 орындық алты қабатты жаңа жатақхананы көріп шықты. Бүгінде мұнда тұрғын және тұрмыстық бөлмелер жиһазбен жабдықталып жатыр. Қазақстан инженерлік-технологиялық университеті мекемесі енгізілгеннен кейін қала сыртындағы студенттерге арналған тұрғын үйге қажеттілікті толығымен қамтамасыз етеді.
Сонымен қатар қазір Асфендияров атындағы ҚазҰМУ жанындағы 600 орындық тоғыз қабатты жатақхана құрылысы аяқталуға таяды. Алаңы 11 мың шаршы болатын ғимараттың ішкі әрлеу және тиісті аумақтарды көріктендіру жұмыстары қалған.
«Президенттің бес әлеуметтік бастамасын» жүзеге асыру аясында биыл «Алматы жастары» бағдарламасы жалғасып жатыр. Жас отбасыларға 5% мөлшерлемемен бастапқы төлемсіз жеке тұрғын үй сатып алуға мүмкіндік беру мақсатында бюджеттен 2 миллиард теңге бөлінді.
Соңғы жылы Алматыда тұрғын үй құрылысының қарқыны 4 есе өсті, ал кезекті тұрған әр үшінші адам пәтер алды. 1,9 миллион шаршы метр тұрғын үй немесе 16,5 мың жаңа пәтер салынды. Жақын арада тағы 1,5 миллион шаршы метр тұрғын үй немесе 17 мыңнан аса пәтер пайдалануға беріледі.
Мемлекет басшысының тапсырмасы бойынша 2016 жылдан бері бюджет есебінен балабақшалардың төлем бағасы 2,5 есе төмендеді.