«Әкім бол, халқыңа жақын бол» ұстанымымен жұмыс жасайтын Ақтөбе облысының әкімі Бердібек Сапарбаевтың қарамағындағы шенеуніктер мен қытайлық инвесторлардың «шаңын қағып» жатқанын талай көріп, халық арасындағы «Қара халыққа да мұндай жақын әкім болады екен-ау» дегені әңгімені талай естігенімізді «ҚАЗАҚ» газетінің өткен сандарының біріндегі «Саяси портрет» айдарында жазғанымызды көкірегі ояу, көзі қарақты оқырмандарымыз жақсы біледі (Қараңыз: «Шенеуніктердің «шаңын қағатын» әкім», №20-21).
«Ақтөбе ақпарат» орталығының мәліметінше, Ақтөбе облысының әкімі Бердібек Сапарбаев өңірде мұнай кенішін бұрғылаумен айналысатын қытайлық «Ұлы қорған» компаниясының вице-президенті Мэнь Лянькумен кездесті. Екіжақты әңгіме барысында облыс әкімі қазақ жұмысшыларын қысқартпай, басқа шығындарды үнемдеуге кеңес берді.
Бердібек Мәшбекұлының айтуынша, компания басшылары қаражат үнемдегісі келсе іс-сапарлар санын қысқарту керек. Өйткені, компанияда жұмыс істейтін шетелдік мамандар өз отандарына жиі қатынайтын көрінеді. Сондай-ақ, компания қосалқы бөлшектерді Қытайдан сатып алады екен. Әкімнің пікірінше, бұл да компания үшін қосымша шығын болып отыр.
«Қазір үнеммен өмір сүру керек. Шетелдік мамандарды біздің елге тарту мәселесін қатаң қадағалайтын боламыз. Біз қазір өз азаматтарымызды жұмыспен қамтуымыз қажет. Компания 15 жыл бойы мол табыс тауып келді. Сондықтан, қазіргі дағдарыс уақытында құрылтайшылары қолдау көрсетіп, несиені төлеу уақытын созу керек. Қажет болса жарғыға өзгеріс енгізіп, өзге де қызмет түрімен айналыссаңыздар болады», – деді Сапарбаев кездесу барысында.
10 шілде күні «Ұлы қорған» ЖШС жұмысшылардың санын қысқартпау мақсатында мемлекеттік органдармен бірлесе арнайы ұсыныстар әзірлеуі тиіс.
Осындай ұлт қамын жеген қызметі үшін Бердібек Мәшбекұлы халықтың ыстық ықыласына бөленіп жүр. Былтыр Ақтөбенің барлық аудан, ауылын галстуксіз аралаған, жергілікті шенеуніктерге орынды сын айтқан, керек кезде ұрысып тастаған, базардағы бағаны да өзі тексерген, мемлекеттік тілді қорғаған, халықпен бірге қоғамдық көлікпен жүрген Бердібек Сапарбаевты расында да еңбекқор әкім санайтындар өте көп. Ал, халық айтпайды, халық айтса, қалт айтпайды емес пе?
