Тізімдегі діни сайттардың мақсаты — дәстүрлі дінді қалыптастыру және дін мен салт-дәстүрді сабақтастыра отырып, діни теріс ағымдардан қорғау. Бұл сайттар ислам дінін ұлттық тәрбиеден бөлек қарастырмайды.
Muftyat.kz
Muftyat.kz — Қазақстан мұсылмандары діни басқармасының (ҚМДБ) ресми сайты. Басқарманың мақсаты мен міндеті — ислам діні қатынастарын реттеу, оның құндылықтарын насихаттау, Мұхаммед (с.ғ.с.) пайғамбар уағыздарының дұрыс насихатталуын қамтамасыз ету, ислам дінінің, Қазақстан мұсылмандарының бірлігін сақтау, діни ұйымдардағы шариғаттың толық әрі дұрыс орындалуына мән беру, облыстардағы өкіл имамдар арқылы республика мұсылман жамағатының діни мәселелерін шешу, республикада ислам дінін оқытып-үйрететін мамандар даярлау және шетелдің діни ұйымдарымен, бірлестіктерімен, оқу орындарымен қарым-қатынас орнатып, діни әдебиеттер, оқулықтар, т.б. қажет басылымдарды әзірлеу.
Сайт «Сұрақ-жауап», «Мақала», «Жаңалық», «Кітапхана», «Аудиотека» бөлімдері бойынша жұмыс істейді. «Аудиотека» бөлімінен Құран, уағыз, діни өлеңдер, терме, күй, Абайдың қара сөздерін тыңдай аласыз. Сонымен бірге, сайтта Қазақстанның интерактив картасы бар. Бұдан әр облыс, аудандағы мешіттерді табуға болады.
Fatua.kz
Fatua.kz сайты пәтуаға қатысты сұрақтарға жауап береді. Сайттың басты бөлімдерінің бірі — «Ғұламалар кеңесі». Мұнда мамандар мұсылмандық ұстанымға қатысты қоғамда туындаған өзекті мәселелерге ислам негіздеріне сүйене отырып, пәтуа жариялайды. Сонымен бірге ҚМДБ-ның қызметі жүйесі және оның имамдары қызметінің негізгі бағыттарын зерттейді. Уағыз тақырыптары мен жұма уағыздары мәтіндерін бекітеді. Исламның негіздерін, шариғаттың ережелерін бұрмалауға, дінаралық араздыққа, мемлекеттік органдар мен діни бірлестіктер арасындағы қақтығысқа, ұлтаралық кикілжіңдерге алып келетін пікірлер мен үндеулерді болдырмау мақсатында елдегі мұсылмандық ұстаным жағдайына алдын ала талдау жасап, ұсыныстар енгізіп отырады.
Бұдан бөлек, Fatua.kz сайтында «Пәтуа ережесі», «Медиа», «Кітаптар», «Сұрақ-жауап», «Сира», «Тарих», «Сахабалар», «Ханафи мәзһабы» және «Ислами териминдер» бөлімдері жұмыс істейді.
Azan.kz
Azan.kz ислам ақпараттық-ағарту порталы — Алматы қаласы Орталық мешітінің ресми порталы. Порталда «Құран кәрім», «Алла елшісі», «Қажылық», «Құрбан», «Дұға-тілек», «Хадистер», «Ханафи мәзһабы» сияқты танымал тақырыптар бар.
Сонымен бірге ханафи мазхабы бойынша намаз оқуды үйрететін «Намаз», Құран тәпсіріне арналған «Тафсир», үш бөлімді «Дәрістер топтамасы», түрлі тақырыпқа арналған «Мақалалар» және «Жаңалықтар» бөлімі жұмыс істейді.
Дәрістер «Құран және тәпсір», «Ақида», «Фиқһ Хадис», «Пайғамбар өмірбаяны», «Саңлақ сахабалар», «Ислам тарихы», «Ғұламалардың өмірбаяны», «Әдеп (этика) және сопылық», «Пайым-парасат», «Мәнһәж», «Ағымдар мен секталар», «Әпке-қарындастарға» бөлімдеріне жіктелген.
Mazhab.kz
Mazhab.kz — Павлодар облысы Орталық мешітінің ресми порталы. Мұнда «Мақалалар», «Жаңалықтар», «Видео», «Аудио», «Сұрақ-жауап», «Ғибратнама» бөлімдері бар. Сайттың «Ғибратнама» бөімінен адамға ой салатын пайдалы әңгімелерді оқи аласыз.
Ummet.kz
Ummet.kz — «Нұр Астана» мешітінің ресми порталы. Порталда басты үш айдар бар. Олар: «Мешіт тынысы», «Ел іші» және «Жаһан». Сонымен қатар «Жаңалықтар», «Мақалалар», «Сұрақ-жауап», «Ислам тарихы», «Бес парыз» бөлімдері де жұмыс істейді. «Ислам тарихы» бөлімінен пайғамбардың тарихы, ислам жұлдыздары жайлы оқи аласыз.
Nurgasyr.kz
Ақтөбе облыстық орталық «Нұр-Ғасыр» мешітінің ресми сайты. Бұл сайтта да «Жаңалықтар», «Мақалалар», «Ғибрат», «Сұрақ-жауап» бөлімі бар. Сайттан намаз оқуды ханафи мазхабы бойынша үйрене аласыз.
Сонымен қатар сайтта діни сауат ашу курсы бар.
Nasihat.kz
Nasihat.kz ақпараттық рухани-ағарту порталы — Ақмола облысы Науан хазірет мешітінің ресми порталы. Сайтта «Жаңалықтар», «Мақалалар», «Ғибратнама», «Мешіт тынысы», «Қайырымдылық», «Кітапхана», «Сұрақ-жауап» бөлімі бар. Сонымен қатар «Жастар бөлімі», «Әйелдер бағаны», «Балалар әлемі» айдарлары да жұмыс істейді.
Егер мазалап жүрген сұрағыңыздың жауабын білгіңіз келсе, «Мешіт тынысы» бөлімінде имамға кез келген уақытта сұрақ қоя аласыз.
Taglym.kz
Taglym.kz — Талдықорған орталық мешітінің ресми сайты. Бөлімдері: «Жазбалар», «Видео-галерея», «Сұрақ-жауап», «Ислам негіздері». Сайттан өңірдегі жаңалықтарды, тарих, поэзия, жанұя, пәтуа, жұма уағызы, сира жайлы оқып біле аласыз.
