Атыраулық Еламан Саясатов Таиландта әлем чемпионы атанды

22-27 шілде күндері Таиландта Муай-Тай спортынан студенттер арасында әлем чемпионаты өтті. Атыраулық спортшылар 1 алтын және 1 қола медальмен оралды.

Атырау
©Өңірлік баспасөз

54 келі салмақта Қазақстанның ең титулды спортшысы, бүкіләлемдік ойындардың жеңімпазы Еламан Саясатов ел намысын қорғады. Ақтық сында спортшымыз ресейлік Асланбек Зикриеевті 29:28 есебімен тізе бүктірді.

“Ресейлік спортшымен болған финалдық кездесу оңайға түскен жоқ. Себебі қарсыласым – танымал әрі тәжірибелі спортшы. Соңғы рет екеуміз Польшада бақ сынасып, мен жеңіске жеткен болатынмын. Сол себепті ескі қарсыласымды алдын ала біліп шықтым. Мақсатым – қатысқан барлық жарыста жеңіске жетіп, Қазақстанның атын шығару”, – дейді Еламан Саясатов.

Одан бөлек 63,5 келі салмақта Әбіл Ғалиев қола жүлдегер атанды. Ол іріктеу кезеңінде Польшалық Оскар Сигертті ұтты. Жартылай финалда Беларусь спортшысына есе жіберді.