Оған 4 қазақтың халық әні, Нұрлан Шәуірбековпен бірге жазған әншінің 3 жеке әні және ағылшын тілінде 1 авторлық әні топтастырылған. Әндердің басым көпшілігі қазақ тілінде жазылған және олардың бәрі itunes, spotify, deezer онлайн-қызметтерінде қолжетімді.
Осылайша, Сон Паскаль бірмаша үзілістен кейін жаңа әнжинағымен қазақ сахнасына қайта оралмақшы.
Оның уақытша үзіліс жасауына байланысты бірқатар БАҚ «әнші Қазақстаннан біржола кетіп, енді мұнда өнер көрсетпейді» деп жарыса жазған еді.
Бірақ әншінің өзі бұл қауесетті жоққа шығарып, өнерден бөлек оны Қазақстанмен байланыстыратын тағы да бір себептің барын айтты.
«Мен итальяндық болсам да, жаным қазақ. Оған қоса мен өз махаббатымды осы қазақ жерінде жолықтырдым, енді «күйеу бала» болуға дайындалып жүрмін», — деді әнші.
Осы жазда итальяндық әнші өзінің жаңадан құрылған тобымен республика бойынша гастрольге шығып, тыңдармандарын жанды дауыспен орындаудағы жаңа әрі хитке айналған әндерімен қуантпақшы.