Шымкенттік ең қымбат үй Желтоқсан және Қонаев көшелерінің қиылысындағы ауданда орналасқан. Жалпы аумағы 180 шаршы метр болатын төрт бөлмелі пәтер үшін үй иелері 97,5 млн теңге немесе $291 мың сұрап отыр. Бір шаршы метрінің бағасы 541,7 мың теңгені ($1600) құрайды. Пәтерде жиһаз жоқ, алайда жуыну-дәрет алу бөлмесі жаңа техникамен жабдықталған, едені паркеттен жасалған, бірден кіріп, тұра беруге болады.
Рейтинг бойынша екінші орынға Бауыржан Момышұлы даңғылының бойындағы «Akbulak Town» ТҮК-індегі пәтер ие. Толықтай жиһазбен жабдықталған, пайдалануға дайын пәтерде екі жуыну-дәрет алу бөлмесі және екі лоджия бар. Жалпы аумағы – 110 шаршы метр. Үй бағасы – 64,8 млн теңге ($194 мың). Бір шаршы метрінің құны 588 мың теңгеге түседі ($1760).
Рейтингтегі үшінші орынға тағы бір төрт бөлмелі пәтер жайғасыпты. Үй ішіне кейбір жиһаз қойылған, екі жуыну-дәрет алу бөлмесі бар. Пәтер Тәуке хан даңғылының бойындағы тұрғын үй кешенінің екі қабатын алып жатыр. Жалпы аумағы – 142 шаршы метр. Бағасы – 60 млн теңге ($180 мың). Бір шаршы метрінің құны – 422,5 мың теңге ($1300).