Аталмыш шараға Қазақстан жастар Конгресі кеңесінің төрайымы Дариға Назарбаева, Олимпиада жүлдегері Василий Левит, танымал тележүргізуші Сәнді Сұлтан құрметті қонақ ретінде қатысты. Үш күнге созылған слет жұмысында жастарды толғандыратын сауалдар талқыға түсіп, түрлі тренингтер мен шеберлік-сабақтары, көше субмәдениеті фестивалі, түнгі алау жанындағы бейресми кездесу, облыс әкімі Нұрлан Ноғаевпен кездесу, пікірталас, «Жаңа дем» экологиялық акциясы сынды шаралар ұйымдастырылды.
Конгрестің атқарушы директоры Айдын Сәбитов «Жас қару» патриоттық ұйымы жұмысын бастағанын айтып өтті.
«Биыл әскери-патриоттық бағытты айрықша назарға алып отырмыз. «Жас қару» патриоттық ұйымы жұмысын бастады. Тағы бір жаңалық – дүниежүзілік банктің грантын жеңіп алдық. Ауыл жастарының бастамаларын қолдау мақсатында шаралар өтеді. Жалпы, еліміз бойынша 106 конгрестік ұйым бар», – деді Айдын Сәбитов.
Дариға Назарбаеваның айтуынша, еліміздегі туризмді дамытуға жастар атсалысуы керек.
«Алдымызда нақты мақсат болуы керек. Биылғы жыл еліміз үшін оқиғаларға бай жыл болды. ЭКСПО-2017 халықаралық көрмесі әлем назарын бізге аударды. Көрме жұмысынан жастар тыс қалған жоқ. Қазақстанның түкпір-түкпірінен еріктілер жиналды. Туризмді дамытуға жастар атсалысулары керек. Туризм – әлемдегі ең серпінді дамып келе жатқан бизнес түрі. Өз жерімізді білеміз бе? Қасиетті жерлерге, тарихи мұрамызға қаншалықты қанықпыз? Осы сауалдар жауапсыз қалмауы тиіс», — деді ол.
Айта кетейік, Қазақстан жастар Конгресі 2002 жылы Елбасы бастамасымен ашылған.
