Қазақ тазысы мен асыл тұқымды төбеттердің көрме-байқауы өтті
Ақмола облысының орталығы Көкшетау қаласының іргесіндегі Краснояр елді мекенінде 100-ден астам қазақ тазысы мен асыл тұқымды төбеттердің бірінші республикалық көрме-байқауы өткізілді.
Шараны «Рухани жаңғыру» бағдарламасын жүзеге асыру шеңберінде «Қансонар» аңшылардың қоғамдық бірлестігі мен аңшылық шаруашылығы субьектілерінің республикалық қауымдастығы, Ақмола облысының әкімдігі және ҚР ауыл шаруашылығы министрлігі бірлесіп ұйымдастырды.
Көрмеге республиканың түкпір-түкпірінен әкелінген тазы, төбет, спаниель, батыс-сібір лайкасы, дратхаар, ягдтерьер сияқты иттер қатыстырылды.
Байқау ережесі бойынша иттер бірнеше сынақтан өткізіліп, ең үздіктерінің иелеріне арнайы диплом, кубок жəне бағалы сыйлықтар тапсырылды.
