«Сакралды Астана» картасы жасалады

«Рухани жаңғыру» бағдарламасы жобаларының арасында елорданың тарихи-мәдени мұраларын біріктіретін «Сакралды Астана» картасы жасалмақ.

Қала әкімінің орынбасары Ермек Аманшаев Астана аумағында көне түркі кезеңіне жататын археологиялық нысандардың бар екендігін атап өтті. «Барлық ескерткіштер «сакралды картаға» енуі тиіс және тарихи-мәдени мұраларды тереңірек зерттеу үшін құрамына археологтар, тарихшылар, үкіметтік емес және жастар ұйымдарының өкілдері енетін жұмыс тобын құру қажет,»-дейді ол.

«Сакралды карта — бір жағынан өлке тарихын зерттеудің баға жетпес көзі және екінші жағынан — өз жеріңе, астанаңа деген патриоттық қарым-қатынасты қалыптастырудың негізі. Үшіншіден, сакралды карта туристік кластердің айнымас бөлшегіне айналуы тиіс», — дейді Ермек Аманшаев.

Жоба аясында «Бозоқ» қалашығына мәдени-ғылыми экспедиция, қалалық слет және жас өлкетанушылар форумы, білім беру ұйымдарында «Туған жер — рухани жаңғыру» атты сынып және кураторлық сағаттар өткізу және өзге де шаралар көзделіп отыр.

Сондай-ақ жиында «Рухани жаңғыру» Астананың жас патриоттар клубын және қаланың шығармашыл зиялыларының кеңесін құру идеясы айтылды. Бастамашыл топтарға мәдениеттанушылар, тарихшылар, өнер қайраткерлері, археологтар және қаланың жасампаз дарынды жастары енеді.