Музей 2000 жылы Нұрсұлтан Назарбаевтың сәулеттік идеясымен салынған ғимаратта орналасқан.
Музейдің кіреберісінде ҚР Қарулы күштерінің Жоғарғы Бас қолбасшысы Нұрсұлтан Әбішұлы Назарбаевтың көне заман батырлары және қазіргі уақыттағы жауынгерлердің ортасында тұрған бейнесі.
Елбасымыздың айналасында батырлардың шоғырлануы жауынгерлеріміздің «Мәңгілік ел» идеясының алдында қанын да, жанын да аямайтындығын білдіреді.
Ежелгі кезеңнен бүгінгі күнге дейінгі қазақ халқының әскери тарихынан сыр шертетін ескерткіштер, сирек кездесетін экспонаттарды өз қорына жинақтаған музей 5 қабаттан тұрады.
Бірінші қабатта, «Қазақстан Қарулы Күштерінің залы» орналасқан.
Залда еліміздің Қарулы Күштерінің әскер түрлері: Құрлық әскерлері, Әуе қорғаныс күштері және Әскери-теңіз күштері экспозициясы бар. Мұнда алғашқы қазақстандық снаряд, танк, әскери самолеттер, әскери вертолеттер мен әскери кемелердің макеттерін көруге болады.
Бірінші қабаттағы мерзімді көрмелер залының экспозициясына, 15 маусымнан бастап «АМПИР» элиталық антиквариат салонының Қазақстанның мәдени мұрасында тарихи мазмұнға ие ұлттық бұйымдарының коллекциясы қойылды.
Уақытша көрмелер залында, 30 маусымнан бастап «Әзірет Сұлтан» мемлекеттік мәдени тарихи қорық-музейінің «Рухты орда Түркістан» атты жылжымалы көрмесі қойылды. Көрмеге Түркістан мекенінен табылған 250-ге жуық жәдігер қойылған.
Қабанбай батырдың қанжары, XVIII ғасыр (түпнұсқа)
Сауран қақпасында жүргізілген археологиялық қазба жұмыстары кезінде табылған «Тас атқыш оқтар», XIV-XVIII ғасырлар.
12 шілдеден бастап музейдің уақытша көрмелер залында Алматы облысының мәдениет күндері аясында «Туған өлке-тұнған тарих» атты көрмесі ашылды.
«Орбұлақ» және «Аңырайқай шайқасына» арналған экспозиция.
Бұл экспозициядан қолөнер шебері Д.Шоқпарұлының коллекциясынан алынған ортағасырлардағы батырлардың қару-жарақтарын көруге болады.
Сонымен қатар, музей қонақтары жетісулық батырлардың сауытын тамашалай алады.
1916 жылғы ұлт-азаттық көтерілісі жетекшілері туралы ақпарат, қолданған қару-жарақтары көрсетілген экспозиция.
Өмірінің соңғы жылдарын Жетісу өңірінде өткізген Шоқан Уәлихановтың көзі тірісінде қолданған заттары.
Тапанша, ХІХ ғасыр және IV дәрежелі Қасиетті әулие Владимир ордені, муляж.
Бұрыш ұнтақтағыш, күміс қасық пен тостаған, ХІХ ғасыр.
Шоқан Уәлиханов атындағы ҚР Қорғаныс министрлігі кадет корпусының мерекелік кадет формасы.
Қазба жұмыстары кезінде Есік қорғанынан табылған б.д.д. VІІ-ІІІ ғасырларда Қазақстан территориясында өмір сүрген көшпенділердің көне тарихы мен мәдениетінен сыр шертер «Алтын адамның» көшірмесі.
ЕКІНШІ ҚАБАТ
«Ежелгі дәуір – XIX ғасыр» залында қазақ халқының қару жасау шеберлігінің даму тарихы көрсетіледі. Мұнда, Қазақстан аумағынан табылған тас дәуірінен бергі жәдігерлер орналасқан.
«XX ғасырдағы әскери тарих» залында өткен ғасырдағы Қазақстанның әскери және жауынгерлік тарихының барлық негізгі кезеңдерімен байланысты экспонаттар көрсетілген.
Екінші қабаттың «Уақытша көрмелер» залында, 28 маусымнан бастап Ақтөбе облысының Астана қаласындағы мәдени күндеріне орай «Дулығалы дала перзенттері» атты жылжымалы көрмесі қойылды.
Арғынғазы ханның кіреуке сауыты, жез тостағаны, ағаш ожауы.
Тама Есет батырдың сауыты XVIII ғасыр
Есет батырдың қылышы
Тас, қола және темір дәуірінде қолданылған құрал-саймандар.
ҮШІНШІ ҚАБАТ
Үшінші қабаттағы, «XX-XXI ғасырлардағы қару-жарақ» залына экскурсия барысында музей қонақтары тапанша, автомат, граната атқыш, оқшашар мен оқ-дәріден бастап әртүрлі қару-жарақ түрлерімен, сондай-ақ, XX-XXI ғасырдың авиациялық жою құралдарымен танысады.
ТӨРТІНШІ ҚАБАТ
Музейдің төртінші қабатында орналасқан «Бейнелеу өнері» залында 23 маусымнан бастап итальяндық суретші, жұмыстарының ерекше орындау техникасымен бүкіл әлемге танылған Миро Персоляның көрмесі ашылды.
Миро Персоля өзінің алдына өнерді табиғи мақсатқа жеткізуді мақсат етеді. Туындыларын көркем сурет ымымен, материалдармен және түрлі түспен араластырып, біздің қазіргі заманғы өмірімізді және қорғашан ортаны бояумен жеткізеді.
БЕСІНШІ ҚАБАТ
Қазақстандық суретшілердің туындылары қойылатын бесінші қабаттағы көрмеде 22 маусымнан бастап ҚР Суретшілер одағының мүшелері Бақытнұр Бүрдесбеков, Әділғали Баяндин және Абай Чунчалиновтің «Қазіргі заманғы қазақ суретшілерінің үздік туныдылары» атты көрмесі қойылды. Көрме патриотимзге, Отанына, елі мен жеріне деген сүйіспеншілікке толы.
Қазақстан қарулы күштерінің 25 жылдығына арналған материалдар топтамасының келесі фотобаяндамасы — ҚР Қарулы күштерінің Әскери-тарихи музейінің «Қазақстан Қарулы Күштері» залына арналады.
Материалдың авторы: Айнұр МАРАТ
Материал ҚР Заңнамасына сәйкес қорғалған. Барлық авторлық құқықтар BARIBAR.KZ интернет-порталына тиесілі. Материалдың кез келген бөлігін көшіру, тарату үшін редакцияның жазбаша рұқсатын алу қажет.
