Қазақстанда бірқатар шай өнімдерін әкелу мен өткізуге қойылған шектеулер алынды. Бұл туралы Baribar.kz хабарлап отыр.
Санитариялық-эпидемиологиялық бақылау комитетінің мәліметінше, шектеулер Orda Trade Astana ЖШС-не тиесілі бірнеше шай өніміне қатысты алынған.
Шешім өнімнің өндірісі мен айналымының барлық кезеңінде сәйкестендіру мен қадағаланушылықтың қамтамасыз етілгенін растайтын материалдарды қарау нәтижелері бойынша, сонымен қатар санитариялық-эпидемиологиялық сараптама қорытындылары негізінде қабылданды, – делінген комитет хабарламасында.
Шектеулер Қазақстан Республикасының «Халық денсаулығы және денсаулық сақтау жүйесі туралы» кодексінің 38-бабы 1-тармағының 15) тармақшасына сәйкес алынып тасталды.
Шектеуі алынған өнімдер тізіміне:
- «Апамның шәйі Premium gold»;
- «Орда Кения»;
- «Аль-Кайрат шәйі Premium gold» өнімдері енгізілген.
Комитет өкілдері өнімдердің санитариялық талаптарға сәйкестігі тексерілгенін атап өтті.
Еске салайық, бұған дейін жұртшылық пайдаланып жүрген кейбір шайларды әкелуге және сатуға тыйым салынған болатын.
