Алматыдағы №18 емхананың Таугүл ықшам ауданындағы филиалы 2024 жылғы қазанда жөндеу үшін жабылған еді. Бір жылдан соң 2025 жылғы мамырда қайта ашылып, жұмысы жалғасты. Ал бүгін ресми ашылды. Baribar.kz тілшісі емхананың жөнделгеннен кейінгі келбетін көріп қайтты.
№18 емхананың үш филиалы бар: Мамыр филиалы 1-Мамыр шағын ауданындағы 29/17 мекенжайында, Таугүл филиалы Тоқтаров көшесі, 10-үйде, ал үшінші филиал Дубок шағын ауданы, Ықылас көшесі 1 Г мекенжайында орналасқан.
Мамырдағы бес қабатты филиал жап-жаңа — 2023 жылы салынған. Ал Ықылас көшесіндегі филиал ең ескісі — 1978 жылы салынып, толық жөнделмеген. Енді соның орнына келер жылы Қуаныш шағын ауданында жаңа филиал салынады деп жоспарланып отыр.
Біз бір жыл бойы толық жөнделген Таугүл филиалына келіп тұрмыз. Ықшам аудандағы халық саны — 6 мың адам. Бұл халықтың бәрі осы филиалда қаралады.
Емхананың бас дәрігері Сәулет Тәңірбергенқызының айтуынша, мердігер қызметін адал атқарып, жұмысты толық бітіріп берген.
Емхананың шатыры әбден ескірген еді. Шатырды жөндеп, толық демонтаж жасалды да, қайтадан қапталды. Емхана ғимаратының сырты да ескірген еді. Ол да қапталды. Бұл медицина орталығы о баста 2006 жылы амбулатория ретінде салынған болатын. Бір қабатты. Ол кезде бұл жер қалаға кірмейтін. Алматы облысының, Қарасай ауданына қарайтын. Айналаның бәрі саяжай еді. Амбулатория болып салынған соң бір де бір рет толық жөнделмеген. Енді жақсылап жөнделіп, қуанып отырмыз. Бір жыл бойы мердігермен бірге жұмыстың басы-қасында жүрдік, — дейді Сәулет Тәңірбергенқызы.
№18 емхананы толық жөндеген мердігер компания — Nikon Stroy жауапкершілігі шектеулі серіктестігі.
Бас дәрігердің айтуынша, емхананың іші санитария нормативі бойынша жөнделіп шыққан. Зертхананың кейбір құрал-жабдығы жаңарғаны болмаса, басқа бөлімнің жабдықтары онсыз да жаңа.
Емханада әйелдерге консультация беру, жалпы практика дәрігері, балалар дәрігері, УДЗ кабинеті, фильтр кабинеті және зертхана бар. Стандарт бойынша, әйелдерге консультация беру бөлімін қызғылт түске, жалпы практика дәрігері бөлімін көгілдір түске және балалар дәрігері бөлімін ашық жасыл түске бояттық. Емханаға тіркелген ересектер мен балалар осы бағыттағы қызметтің бәрін алып отыр, — дейді дәрігер.
Емхананың зертханасы біршама жаңа медициналық жабдықпен толыққан. Зертханадағы маман Бақытжамал Якиева жаңа жабдықтар туралы айтып берді.
Зертханамызда негізгі анализдерді өзіміз жасаймыз. Биохимиялық анализдің 13 параметрін mindray аппаратында жасаймыз. Бұл аппаратты 2023 жылы алдық. Биыл немістің коагулометр аппаратын алдық. Мұнда қан ұйығыштықтың төрт параметрі бойынша анализ жасаймыз, — дейді Бақытжамал Якиева.
Зертхананың екінші кабинетінде HumaCount 5D гематология анализаторы бар. Аппарат 5 класс бойынша анализ жасайды. Бұған дейін емханада 3 класс бойынша анализ жасайтынбыз. Қалған кластарды тексеру үшін анализдерді басқа зертханаларға жіберуге тура келетін. Бұл дәрігерлердің жұмысына ыңғайсыз еді. Енді бұл мәселе шешілді.
Бұл — ЭТЖ-метр (СОЭ-метр). Қандағы эритроциттердің тұну жылдамдығын анықтайды. Бұрын бұл анализді қолмен жасайтынбыз. Сонда қате кетіп жататын. Ал қазір аппарат арқылы анализ қорытындысы нақты шығады, — дейді зертханадағы маман.
Зертханада несеп анализаторы екеу.
Біріншісін жапондар жасаған. Аппарат жақсы, алайда креатинин мен микроальбуминмен қарайтын мүмкіндігі жоқ. Сондықтан биыл немістің Combilyzer деген несеп анализаторын алдық. Мұнда креатинин мен микроальбуминмен қарайды. Қазір скриниң бойынша, осы екі анализ керек, — деп түсіндірді Бақытжамал Якиева.
