Не болды?
Шалқар ауданындағы «Ұлы Борсық» коммуналды кәсіпорын қызметкерлері жалақы кешігетініне шағымданып отыр. Қызметкерлер президентке, премьер-министр Олжас Бектеновке және ҰҚК төрағасы Ермек Сағымбаевқа бейнеүндеу жолдады.
Мәлімет
Қызметкерлердің шағымы мынадай:
- жалақы үнемі бір-бір жарым ай кешігеді, зейнетақы қорына, медициналық сақтандыру жарнасының ақысы жеті-сегіз ай төленбеген;
- еңбек демалысының төлемі кешігеді;
- 2019 жылы жалақы көтерілген, бірақ ол ақша да жұмысшыларға жетпеген;
- аудит жүріп, 190 млн теңге көлемінде бұзушылық анықтаған, алайда іс белгісіз себептермен жабылған;
- сыйлықақы жоқ;
- зиян еңбек жағдайы үшін арнайы көмек берілмейді, кәсіподақ та қызметкерлерге ешқандай көмек бермейді.
Жалақымызды тезірек берсе екен. Мектеп уақыты келе жатыр, балаларымыз сабаққа барады, бәрімізге ақша керек. Талабымыз орындалса екен, — дейді қызметкерлердің бірі.
Әкімдік не дейді?
Шалқар ауданы әкімдігі мұндай мәселе бар екенін мойындап отыр. Шенеуніктердің айтуынша, шілде айының жалақысы қыркүйек айының басында толық төленеді, ал тамыз айының ақшасы осы айда беріледі. Ал сыйақы кәсіпорын қиын қаржылық жағдайда отырғандықтан берілмей жүр.
