«Парламент сөзі» сыйлығына өтінімдер қабылдау басталды

Бүгіннен бастап заң шығару қызметін үздік жазып-көрсеткендерге арналған «Парламент сөзі» сыйлығына үміткерлердің өтінімдері қабылданады.

Бұл сыйлыққа Палатаның заң шығарушылық қызметі жайында 2016 жылдың 1 қыркүйегі мен 2017 жылдың 14 маусымы аралығында жарық көрген материалдар қабылданады.

Мәжілістің қызметі туралы үздік телевизиялық, мерзімдік баспасөз, интернет және радиоматериалдар, сонымен бірге фото және бейне-материалдар бойынша жеңімпаздар анықталады. Сондай-ақ, Қазақстан парламенттік журналистикасының дамуы мен өркендеуіне үлес қосқандар да ескеріледі.

Сыйлыққа кімдер ұсынады?

Сыйлыққа үміткер кандидаттарды бұқаралық ақпарат құралдарының басшылары, шығармашылық одақтар, қоғамдық бірлестіктер ұсынады. Сондай-ақ, бұл бәйгеге өзін-өзі ұсыну арқылы жеке журналистер де қатыса алады.

Өтінім бұқаралық ақпарат құралының, шығармашылық одақтың, қоғамдық бірлестіктің ресми бланкісіндегі, басшы немесе оны алмастыратын адам қол қойған хат, өзін-өзі ұсынған жағдайда – сыйлыққа үміткердің өзі қол қойған хат жөнелтіледі. Осыларға қосымша, сыйлыққа үміткер туралы қысқаша ақпарат (Т.А.Ә. лауазымы, байланыс телефондары, пошталық мекенжайы, электрондық поштасы) көрсетіледі.

Жарияланған немесе эфирге шыққан жарияланымдардың мәтіндері, аудио, бейне-фотоматериалдар не ғаламторда шығарылған материалдарға сілтемелер бірге беріледі.

Өтінімдер 2017 жылдың 15 маусымына дейін қабылданады.

Өтінімді Қазақстан Республикасы Парламенті Мәжілісінің сыйлығын беру жөніндегі Комиссия жұмыс органына – Мәжіліс баспасөз қызметіне – 000001, Астана қаласы, Мәңгілік Ел даңғылы, 4, Қазақстан Республикасы Парламенті Мәжілісіне немесе [email protected] электронды адресіне жолдау қажет. Қосымша ақпаратты: Мәжілістің ресми сайтынан немесе (8) (7172) 24-38-22 телефоны арқылы алуға болады.

Баспасөз басылымдары мен ғаламтор-басылымдарда жарияланбаған, сондай-ақ теле- және радоэфирге шығарылмаған, парламент тақырыбына сай келмейтін материалдар мен Комиссия жұмыс органына құжат қабылдау мерзімінен өтіп кеткенде материалдар қарастырылмайды.

Комиссия сыйлыққа номинацияланатын жұмыстарды бағалау кезінде тақырыптың жазылып-көрсетілу тереңдігін, материалды берудегі кәсіби шеберлік пен объективтілікті, оның көркемдік ерекшеліктерін бағалайды.

Сыйлық иелері Байланыс және ақпарат қызметкерлерінің күні қарсаңында жарияланады.

Қазақстан Республикасы Парламенті Мәжілісінің төрағасы Нұрлан Нығматулин өткен сессияның аяғында журналистерге арналған сыйлық белгілеу бойынша Мәжіліс бюросының шешімін жариялаған болатын.

Айта кетейік, «Парламент сөзі» сыйлығы журналистерге алғаш рет тапсырылғалы отыр.

ДереккөзBaq.kz
Telegram арнамызға жазылыңыз

Күннің маңызды және өзекті жаңалықтарын телеграм каналынан оқыңыз