Қылмыстық кодекске некеге тұруға мәжбүрлеу үшін қылмыстық жауаптылық көзделген жаңа 125-1-бабы енгізілді. Бұл туралы бас прокуратура хабарлап отыр.
Аталған заңға мемлекет басшысы 2025 жылғы 16 шілдеде қол қойды.
Мәжбүрлеу, әсіресе қысым, қорқыту, психологиялық немесе физикалық зорлық көрсету – бұл адамның негізгі құқықтарын бұзу болып табылады.
Бас прокуратураның мәліметінше, көптеген елде мұндай әрекет ауыр қылмыс ретінде қарастырылады, себебі мәжбүрлі неке оқшаулау, еркіндікті шектеу, зорлық-зомбылық және кейбір жағдайларда құрбандардың өз-өзіне қол жұмсау әрекеттерімен қатар жүруі мүмкін. Тіпті бірқатар елде мұндай неке адам саудасының бір түрі ретінде танылады.
Кейінгі бес жылда Қазақстанда осындай 257 қылмыстық іс тіркелді, олардың 95%-ы тоқтатылды. Жаңа заңнамаға сәйкес, қорқыту, бопсалау, күш қолдану немесе басқа да қысым көрсету арқылы некеге мәжбүрлеу үшін екі жылға дейін, ал егер ауыр зардаптар болса – 10 жылға дейін бас бостандығынан айыру жазасы көзделеді, — делінген хабарламада.
Сонымен қатар қылмыстық кодекстің 125-бабына өзгерістер енгізіліп, жәбірленушіні ерікті түрде босатса да, істі тоқтатуға жол берілмейді. Енді мәжбүрлі некеге тұру мақсатында әйелді ұрлау қылмыстық кодекстің 125 және 125-1-баптарының жиынтығы бойынша сараланады.
