Павлодар облысында қос азаматтықпен жүрген 1 000-нан астам адам анықталды. Бұл туралы облыстық полиция департаменті хабарлап отыр.
ПД мәліметінше, Қазақстан заңнамасына сәйкес қос азаматтыққа тыйым салынғанына қарамастан, ел ішінде мұндай фактілер әлі де тіркеліп отыр.
Егер азамат басқа мемлекеттің азаматтығын қабылдаса, ол 30 күн ішінде көші-қон қызметіне хабарлап, Қазақстан азаматтығынан шығуды рәсімдеуге тиіс. Алайда тұрғындардың көбісі бұл талапты орындамайды. Қос азаматтықты алудың басты себептері – шетелге еркін шығу мүмкіндігі және материалдық пайда (зейнетақы, жәрдемақы алу), — делінген хабарламада.
2025 жылы Павлодар облысында қос азаматтықтың 1047 дерегі анықталды.
- 28 адам басқа елдің азаматтығын алғанын уақытылы хабарламағаны немесе Қазақстан құжаттарын заңсыз пайдаланғаны үшін жауапкершілікке тартылды.
- Азаматтығын жоғалтуды тіркеу деректері Германия, АҚШ, Түркия, Польша, Испания, Чехия елдеріне қатысты тіркелген.
Павлодар облысы полиция департаменті көші-қон қызметі басқармасының бастығы Қанат Сартовтың айтуынша, мұндай заң бұзушылықтар жиі кездесіп отырады және азаматтарға Қазақстан заңнамасын сақтау қажеттігі ескертіледі.
