Қазақстанда жұмыс істейтін адамдардың үштен бір бөлігі үшін зейнетақы аударымы жасалмайды. Бұл туралы еңбек және халықты әлеуметтік қорғау вице-министрі Асқар Биахметов мәлімдеп отыр.
Бүгінде жалақыны қолма-қол ақшамен алатын адамдар аз емес. Олар үшін тиісті зейнетақы жарналары аударылмайды. 2024 жылдың қорытындысы бойынша жұмыспен қамтылған халықтың 30%-ға жуығы зейнетақы жүйесіне қатыспаған. Жекелеген секторларда еңбек нормативтерінің болмауы да көлеңкелі жұмыспен қамтудың сақталуына ықпал етіп жатыр, — деді Асқар Биахметов үкіметтің бүгінгі отырысында.
Үкіметтің есебі бойынша, биыл алты айдың ішінде жұмыссыздық деңгейі 4,6% болды. Жалдамалы жұмыскерлердің саны 7,1 миллион адамға жетті, ал өзін-өзі жұмыспен қамтығандар 2,1 миллион адам болды.
