Жыл басынан бері мемлекеттік еңбек инспекторлары 19,1 мыңнан астам жұмыскердің құқығын қорғады. Бұл туралы еңбек және халықты әлеуметтік қорғау министрлігі хабарлап отыр.
Республика бойынша 85 кәсіпорын 2 мыңнан астам жұмыскерге 814 миллион теңге жалақысын бермеген. Тексеру кезінде 2,4 мыңнан астам еңбек құқын бұзу фактісі анықталды.
Жалақы бойынша берешегі бар және еңбек құқығын бұзған кәсіпорын басшыларына орындауға міндетті 1 588 ұйғарым берілді және 194 миллион теңге айыппұл салынды, — делінген хабарламада.
Нәтижесінде 1,9 мың жұмыскердің құқығы қорғалып, оларға 677 миллион теңге төленді. Жалпы биыл мемлекеттік еңбек инспекторлары 2 381 тексеру жүргізіп, 2 941 заңбұзушылық анықтаған:
- еңбек саласында – 2 428;
- еңбек қауіпсіздігі және еңбекті қорғау бойынша – 496;
- халықты жұмыспен қамту бойынша – 17.
Қабылданған шаралардың нәтижесінде 17,2 мың жұмыскердің еңбек құқығы қорғалды.
