Жамбыл мен Түркістан облыстарында шегірткеге қарсы 348 мың гектардан астам аумақ өңделді. Бұл туралы ауыл шаруашылығы министрлігі хабарлап отыр.
Бұл өңірдерде 907,09 мың гектар жерге зерттеу жүргізіліп, оның ішінде 7 дрон пайдаланылды. Зиянкестер қоныстанған аумақ көлемі 456 мың гектарды құрап, оның 354 мың гектары экономикалық зияндылық шегінен асты.
Қазіргі таңда 348 мың гектар жер өңделді: Жамбыл облысында — 14 мың, Түркістан облысында — 335 мың гектар. Күрес шараларын тиімді жүргізу үшін 207 жер үсті бүріккіш техника, бес ұшақ, сегіз дрон және 1 000-нан астам маман жұмылдырылған. Өңдеу жұмыстары агротехникалық мерзімде, жоғары биологиялық тиімділікпен жүргізіліп жатыр, — делінген хабарламада.
Биыл шегіртке 2,1 миллион гектар аумаққа таралуы мүмкін деп болжанып отыр.
Бұл өткен жылмен салыстырғанда 1 миллион гектарға аз. Химиялық өңдеуге 443 бүріккіш техника мен 46 дрон тарту көзделген.
