Сириядағы қақтығысты тоқтатуға арналған келіссөз осымен төртінші рет өтіп жатыр. Елордадағы келіссөздердің нәтижесін бүкіл әлем күтіп отыр. Себебі, осы басқасудың нәтижесінде алты жылға созылып, Таяу Шығыстағы ең ірі шиеленіске айналған Сириядағы қантөгіс өз шешімін табуы мүмкін.
Халықаралық қатынастар жөніндегі еуразиялық кеңестің директоры Жанболат Үсеновтың айтуынша, бұл оңай мәселе емес.
«Қазақстандағы келіссөздерге Таяу Шығыста мүдделері бар Түркия, Ресей мен Иран тұрақты түрде қатысып отыр. Парсы шығанағындағы елдердің өкілі ретінде Иордания қатысты, Америка Құрама Штаттары да осы жолы өз өкілін жіберіп, Астана процесінің деңгейін жоғарылатып отыр. Келіссөздердің осы кезеңі біткеннен кейін АҚШ президенті Дональд Трамп Ресей президенті Владимир Путинмен Сириядағы жағдайды телефон арқылы талқыға салуды жоспарлап отыр»,- дейді Жанболат Үсенов.
Айта кетейік, Астанаға Сирия үкіменті мен қарулы оппозициясының өкілдері де қатысып отыр. Олар осыған дейін бір-біріне оқ атып келген еді.
Қазақстан стратегиялық зерттеулер институты директорының орынбасары Санат Көшкімбаев та Атана келіссөздерінің маңыздылығын атап өтті.
«Астана форматындағы келіссөздердің негізі атысты тоқтату режіміне бағытталған, яғни бұл нақты алға қойылып отырған міндет. Сондай-ақ, осы міндеттің техникалық жағына келсек, атысты тоқтату режіміне мониторинг жасау, гуманитарлық көмектің жеткізілуі сынды жұмыстар бар. Бұл мәселелер Женева форматындағы саяси келіссөздерге ықпалын тигізеді. Астана процесінің табыстары Женева келіссөздерінің табысты болуының алғышарты деп санау керек»,- дейді ол.