Перизат Қайрат мемлекетке 3,5 миллиард теңге шығын келтіргені анықталды.
Бұл туралы қаржылық мониторинг агенттігі төрағасының орынбасары Жеңіс Елемесов айтты.
Перизат Қайраттың қылмыстық ісін тергеу аяқталды. Қазіргі кезде материалдармен таныстыру процесі жүріп жатыр. Естеріңізде болса, қылмыстық істі тергеу барысында келтірілген шығын бойынша әртүрлі сома айтылған еді. Қазір 3,5 миллиард теңге сомасындағы шығын анықталды, — деді Жеңіс Елемесов сенаттың жалпы отырысынан кейін тілшілер сұрағына жауап бере отырып.
Оның айтуынша, Перизат Қайраттың тәркіленген мүлкі бойынша соңғы шешімді сот шығарады. Бұл мүлік зардап шеккендерге келтірілген шығынды өтеуге немесе мемлекеттің меншігіне өтеді.
Сонымен қатар ол бұл іс бойынша Перизаттың анасы да күдікке іліккенін нақтылады.
Анасы үй қамақта отыр. Екеуі де күдікті. Анасы да алаяқтық бабы мен қылмыстық жолмен тапқан ақшаны жылыстату бойынша тергелді. Ол қызына көмектесіп, түскен ақшаны өзінің есеп-шотына аударған. Кейін осы қаражатты банктен шешіп алып, үй мен көлік сатып алған. Гүл сататын дүкендерді алуға көмектескен, — деді агенттік төрағасының орынбасары.
Оның сөзіне қарағанда, күдікті Перизат жаңа оңалту орталығының құрылысына, су тасқынының зардаптарын жоюға, Палестинада зардап шеккендерге қаражат жинаған. Бұл 190-бап бойынша үш эпизод алаяқтық бойынша тексерілді, оларға қатысты тергеу аяқталды. Сонымен қатар қылмыстық жолмен табылған қаражатты активтерге біріктіру арқылы жасырған екі факті бар.
Дәл қазір зардап шеккендердің нақты санын айта алмаймын, олардың саны өте көп. Қомақты қаржы салған жәбірленушілер де бар. Бұл істер бойынша Перизат Қайрат кінәсін мойындамай отыр, — деді Жеңіс Елемесов.
Естеріңізге сала кетейік, Перизат Қайрат көктемгі су тасқынынан зардап шеккен азаматтарға көмек беру үшін, сонымен қатар Палестина тұрғындарына гуманитарлық көмек беру үшін жиналған 1,7 миллиард теңгеден астам қаражатты жымқырды деген күдікке ілінген болатын.
Еріктілер қозғалысының белсендісі және қоғамдық қайырымдылық қорының құрылтайшысы Перизат Қайрат ұсталып, тергеу басталғанын хабарлаған болатынбыз. Ол екі ай қамауға алынды.
Перизат Қайрат құрған Biz birgemiz Qazaqstan 2030 қоры жабылды.
