Қаржы мониторингі агенттігінің Алматы бойынша департаменті алаяқтық жасады деген күдікпен үш шетел азаматын ұстады.
Бұл туралы агенттіктің баспасөз қызметі хабарлап отыр.
Олар жалға алған пәтерде тінту жүргізу барысында алты SIM-бокс анықталып, тәркіленді.
Еске салайық, бұл құрылғылар алаяқтық схемаларда кең көлемде қоңыраулар жасау, хабарламалар жіберу және абоненттік нөмірлерді өзгерту үшін қолданылады.
Сонымен қатар әртүрлі мобайл операторлардың 5 мыңнан астам SIM-картасы тәркіленді.
Аталған тұлғаларға қатысты ҚР қылмыстык кодексінің 213-бабы 2-бөлігі бойынша – «ұялы байланыс абоненттік құрылғысының идентификациялық кодын заңсыз қолдану, абонентті сәйкестендіру құрылғысын заңсыз өзгерту және идентификациялық кодты өзгертуге арналған бағдарламаларды жасау, пайдалану, тарату» қылмыстық іс тіркелді.
Күдіктілер екі ай мерзімге қамауға алынды. Олардың интернет-алаяқтыққа қатыстылығы тексеріліп жатыр. Тергеу мүддесі үшін өзге ақпарат жариялауға жатпайды.