Жолда жүруге тек тіркелген мопедтерге рұқсат етіледі. Бұл туралы ішкі істер министрінің орынбасары Игорь Лепеха мәлімдеп отыр.
Бүгінгі таңдағы дерек бойынша, елімізде 18 200 мопед тіркелген. Былтыр осы санаттағы көлік құралдарына арналған 22 мың жүргізуші куәлігі берілді. Ал биыл бұл көрсеткіш 2,5 мың болды, – деді Игорь Лепеха.
ІІМ басшысының орынбасары мопед иелеріне тіркеу мерзімі аяқталып қалғанын ескертті.
4 сәуірге дейін өте аз уақыт қалды. Біз тіпті ХҚКО-ларға жұмыс уақытын ұзартуды сұрадық, тіркелгісі келгендер үлгерсін деп. Себебі осы мерзімнен кейін тіркелмеген мопед иелері заңды түрде жолға шыға алмайды, – деді ол.
Бұған дейін ішкі істер министрлігі 5 сәуірден бастап тіркелмеген мопедтерді басқару заңбұзушылық болып саналатынын ескерткен еді.
Айта кетейік, 2025 жылғы 5 сәуірден бастап мопедтер ресми түрде механикалық көлік құралдары санатына енгізіледі. Тиісті заңға Қасым-Жомарт Тоқаев өткен жылғы қазан айында қол қойған болатын.
