Ақмола облысында полиция ЭЦҚ арқылы жасалған алаяқтықты тергеп жатыр. Бұл туралы Polisia.kz хабарлап отыр.
Ақмола облысында жергілікті тұрғын электрондық цифрлық қолтаңбаны пайдалану арқылы жасалған алаяқтықтың құрбаны болды. Полицияға жүгінген әйелдің айтуынша, оның жиені өз атына рұқсатсыз 629 мың теңге көлемінде 11 микрокредит рәсімдеген.
Зардап шегушінің сөзіне қарағанда, 2025 жылғы 6 наурызда ол жиенінен ЭЦҚ алу процесіне көмектесуін сұраған. Жас жігіт ноутбук арқылы белгілі бір сайтқа кіріп, фото және бейне тексеруден өтуді сұраған. Кейін ЭЦҚ сәтті жасалғанын хабарлаған.
Алайда, 8-26 наурыз аралығында әйелге белгісіз қаржы ұйымдарынан күмәнді хабарламалар келе бастаған. Алаяқтықтан қауіптеніп, ол ешқандай әрекет жасамаған. Тек 27 наурызда Халыққа қызмет көрсету орталығына жүгінгенде, оның атына 11 микрокредит ресімделгені белгілі болды, — деп жазылған хабарламада.
Қазіргі уақытта аталған факт бойынша сотқа дейінгі тергеу амалдары жүргізіліп жатыр. Мамандар азаматтарға алаяқтардың құрбаны болмау үшін жеке деректерді бөтен адамдарға бермеу жөнінде ескертті.
