Жапония қазақстандықтарға виза жөнінде жеңілдіктер жасады

Жапония қазақстандық азаматтар үшін келу визасын рәсімдеу мен олардың болу мерзімін ұзарту тәртібіндегі жеңілдетулер жасағаны туралы мәлімдеді.

виза visa

Бұл туралы ҚР сыртқы істер министрі Қайрат Әбдірахманов пен Жапонияның сыртқы істер министрі Фумио Кисидоның кездесуі барысында мәлім болды.

Кездесу барысында сұхбаттасушылар ҚР Президенті Нұрсұлтан Назарбаевтың 2016 жылғы қарашада Жапонияға мемлекеттік іссапары шеңберінде қол жеткізген келісімдерді жүзеге асыру барысын қарастырып, сондай-ақ, екіжақты ынтымақтастықтың қазіргі ахуалы мен болашақтағы бағытын, көпжақты форматтағы өзара әрекеттесу, соның ішінде БҰҰ Қауіпсіздік Кеңесі жұмысы аясындағы күштерді үйлестіруді қоса талқылады.

Қазақстанның Сыртқы істер министрлігінің басшысы жапон әріптесін Қазақстанның сауда-экономикалық, инвестициялық, транзиттік-көліктік саясатының басымдықтарымен таныстырды.

Жапония министрі екіжақты форматтағы өзара әрекеттесуді қозғау кезінде ҚР Президенті Нұрсұлтан Назарбаевтың «Нұрлы жол» мемлекеттік бағдарламасының, соның ішінде еліміздің көліктік-транзиттік әлеуетінің тартымдылығы мен оның өзектілігін атап өтті. Астанада өтетін «ЭКСПО-2017» мамандандырылған көрмесінде Жапония өзінің жаңа технологиялық зерттеулерін ұсынады.