Алмас Кішкенбаевқа қатысты іс Алматыдағы әкімшілік құқық бұзушылықтар бойынша мамандандырылған ауданаралық сотта қаралады.
Сот іс материалдарын қабылдады.
Сотта Кішкенбаев Алмас Бексейітұлына қатысты Қазақстан Республикасының әкімшілік құқық бұзушылық туралы кодексінің 434-бабының 1-бөлігі («Ұсақ бұзақылық») бойынша әкімшілік құқық бұзушылық туралы іс қаралып жатыр. 2024 жылғы 31 қаңтарда іс бойынша мән-жайларды қарастыру мүмкін болмады, себебі жәбірленуші, кәмелетке толмаған К.-ның заңды өкілі ауызша өтініш білдіріп, іс материалдарымен танысу үшін қарау күнін кейінге қалдыруды сұрады, – делінген сот кабинетіндегі ақпаратта.
Сот отырысы бүгін, 3 ақпанда өтеді.
Алмас Кішкенбаевқа ӘҚБтК-нің 434-бабы 1-бөлігі бойынша айып тағылып отыр. Осы бап бойынша оған 20 АЕК (78 640 теңге) айыппұл немесе 5-тен 15 күнге дейін әкімшілік қамауға алу жазасы тағайындалуы мүмкін.
Айта кетейік, Алматы полициясы 17 жастағы жасөспірімнің арызына қатысты тергеу жүргізіп жатыр. Жасөспірімнің айтуынша, 40-қа таяған ер адам оған сыраға тапсырыс беріп, кейін бірге ішуді ұсынған. Алғашқы ақпаратты журналист Михаил Козачков таратты. Оның мәліметінше, күдікті – белгілі әнші Алмас Кішкенбаев.
