2025 жылы еліміздің колледждерінде мемлекеттік тапсырыс 153 мың орынға дейін артады. Бұл туралы оқу-ағарту министрлігі хабарлап отыр.
Биыл сұранысқа ие техникалық және кәсіптік білім беру бойынша 153 мың студент тегін оқумен қамтылады, бұл көрсеткіш өткен жылмен салыстырғанда 10 мың орынға артты, — делінген хабарламада.
Мемлекеттік тапсырыстың 70%-і техникалық мамандықтарға, оның ішінде машина жасау, көлік, энергетика, IT, құрылыс және басқа да салаларға бөлінеді.
Қазіргі уақытта колледждерге 518 кәсіпорын қамқорлық көрсетеді, олардың санын 4 мыңға жеткізу жоспарланып жатыр. Сонымен қатар жұмыс берушілермен бірлесіп, кәсіптік стандарттар мен мемлекеттік жалпыға міндетті білім беру стандарттары және WorldSkills стандарттарының талаптарын ескере отырып, 8 мыңға жуық білім беру бағдарламасы әзірленді.
Биыл колледждер мен жұмыс берушілер 2 мыңнан астам білім беру бағдарламасын әзірлейді және өндірістік базада 2 мың педагог тағылымдамадан өтеді.
