Астанада коммуналдық қызметкерлер қар күреу бойынша тәулік бойы жұмыс істеп жатыр. Қаладан бір күнде 38 мың текше метрден астам қар шығарылды.
Бұл туралы қала әкімінің ресми сайты хабарлап отыр.
5 қаңтар күні күндізгі ауысымға қала көшелерінің қарын күреуге 337 жол жұмысшы мен 1 206 техника шықты. Олардың күшімен қаладан 2 938 рейспен 38 602 текше метр қар шығарылды.
Қыс мезгілінің басынан бері елордадан 178 098 рейспен 2 352 714 текше метр қар шығарылды.
Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сонымен қатар қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және тағы басқалары тазартылады.
Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.
Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.
Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.
Төтенше жағдай туындаған кезде «112» нөміріне хабарласыңыз.
