Қос боксшы арасындағы жекпе-жек 8 раундқа жоспарланған. Екеуі де салмақ өлшеуден сәтті өтті. 135 фунтқа дейінгі (61,2 келі) салмақ дәрежесінде жұдырықтасуға рұқсат берілді.
Орландо кәсіпқой бокста 2008 жылдан бері жүр. 32 жасар боксшының еншісінде 28 жекпе-жек бар. Оның 19-ында жеңіске жеткен.
«Ризоны аз-кем зерттеп үлгердім. Солақай боксшы екендігі бірден өзіне назар аудартты. Тәжірибелі, әрі әккі боксшы екені көрініп тұр. Бір соққымен жекпе-жек тағдырын шешіп тастағысы келетін боксшылардың қатарынан екен. Дегенмен, егер оған төбелес керек болса, мен дайынмын. Мен де нокаутты жақсы көремін. Маған да керегі сол. Оның үстіне, Майамидегі дайындығым жақсы болды. Кубалық маман Осмири Фернандестен біраз нәрсе үйрендім. Шаршы алаңға шығып, Ризомен бетпе-бет қалуымды асыға күтіп жүрмін. Жанкүйерлерімді жарқын жеңісіммен қуантуға тырысамын», – деді Айдар Шәрібаев.
Соңғы жекпе-жегін 17 наурыз күні Майамиде өткізген Шәрібаевтің еншісінде бес айқаста бес жеңіс бар. Төрт қарсыласын нокаутпен жеңген ол бүгінде чемпиондық айқасқа кубалық маман Осмири Фернандестің қарамағында дайындалып жатыр.
