Астана әкімі Жеңіс Қасымбек Instagram парақшасында қалада инватакси санының үш есеге артқанын жазды.
Бұл туралы елорда әкімдігі хабарлап отыр.
Мүмкіндігі шектеулі жандармен және қоғамдық ұйымдардың өкілдерімен, сол сияқты ерекше балаларды тәрбиелеп отырған ата-аналармен тұрақты түрде кездесіп тұрамын. Бірлесе отырып, ерекше қажеттіліктері бар адамдардың өмір сүру жағдайын жақсартамыз, — деді Жеңіс Қасымбек.
Кездесуде инватакси, халықтың қауқары аз топтары үшін қолжетімді орта, тротуарлар мен аялдамалардың ыңғайлылығы және тағы басқа мәселелерді талқылады.
Жаңа қоғамдық кеңістіктер мен аулаларды, жаяу жүргіншілер тротуарлары мен жолдарды абаттандыру барысында барлық санаттағы адамдардың мүдделерін ескереміз. Сонымен қатар маңызды мәселе – инватакси. Жыл сайын инватакси санын көбейтіп жатырмыз. Мәселен, бұрын 50 машина болса, алғашқы кезеңде 113 машинаға дейін арттырдық. Қазір инватакси саны – 147. Бірақ бұл да қаланың қажеттілігін толық қамти алмайды. «Биыл жарты жылда инватакси санын еселеп көбейттік. Бүкіл еліміз бойынша елордада инватакси саны қала тұрғындарына шаққанда көп. Осы нарықта жұмыс істейтін компанияларға арбада отыратындарға арналған автомобиль алуға көмектестік. Біз ережеге өзгеріс енгізу арқылы аутистерге де инватакси қызметі қолжетімді болуын қолға алмақпыз. Сондықтан сіздің бастамаңызды қолдаймыз, мүмкіндігінше құзырлы министрлікке шығып, ережелерге кейбір өзгерістерді енгізуге атсалысамыз. Жалпы, келесі жылы да инватакси санын көбейту үшін қаржыландыруды арттырмақпыз», — деді Жеңіс Қасымбек. Сол себепті олардың санын арттыруды ары қарай да жалғастырамыз. Сонымен қатар мектептер мен балабақшаларда инклюзияны қолдау кабинеттерін ашуды, осы санаттағы адамдармен жұмыс істеу үшін мамандарды оқытуды жалғастырамыз. Сол сияқты колледж базасында ерекше қажеттіліктері бар балаларды жаңа мамандықтар бойынша және т.б. оқытамыз. Кездесу барысында көтерілген мәселелерді шешу жұмысы қолға алынды, — деп жазды елорда әкімі.
Пилоттық жоба шеңберінде азаматтар Яндекс Go мобильді қосымшасы арқылы Инватакси қызметін қолдана алады. Бұл қызметті алушы үшін көлікті тезірек таңдауға, онлайн режимінде тапсырыс мәртебесін қадағалауға және жасалған сапарларға мониторинг жүзеге асыруға мүмкіндік береді.
