Бүгін ҚР Ауыл шаруашылығы министрлігінде «Агроөнеркәсіптік кешенді дамыту мәселелері бойынша ҚР кейбір заңнамалық актілеріне өзгерістер мен толықтырулар енгізу» туралы заң жобасы талқыланды. Талқылау барысында ҚР Ауыл шаруашылығы вице-министрі Төлеутай Рахымбеков субсидия механизмдеріне өзгерістер енгізілгенін айтты. Оның айтуынша, бұрын болған 65 субсидия түрінің 11-ін жойылып, 40 түріне өзгеріс енгізілген. Себебі, кейбір субсидиялардың заманы өтіп, қазіргі уақыт үшін тиімсіз болып қалған.
«Ол кезде жағдай басқа болды. Мысалы, бидайды алайық. Оның гектарына 300 теңге субсидия болатын. Ал фермердің жалпы шығыны 1 гектарға 30 мың теңгеге жететін. Сонда біз шығынның 1%-ын ғана субсидиялап келдік. Қандай тиімділік бұл субсидиядан? 2016 жылға дейін біз осы талаппен келдік», — деді вице-министр.
Оның айтуынша, субсидиялар тиімсіз болғаннан кейін өз жұмысын тоқтатқан. Ал кейбір талаптар жемқорлыққа да жол ашқан екен.
«Мысалы, бір ауданда орта есеппен алғанда 200 гектар жер бар. Бекітілген механизм бойынша аудандық ауыл шаруашылық бөлімінің мамандары барып, сол жерлерді тексеру керек болатын. Мысалы, «бидай шықты ма, шықпады ма?» деп. Содан кейін актіні әзірлеу қажет. Кейін шығарылған актінің аясында субсидия бөлінеді. Аудандағы әкімшілікте 3-4 адам отыр. «Олар 200 мың гектарды толығымен тексеріп шықты» деп кім дәлелдей алады? Сондықтан осы механизмдер өзгертілді», — деді басшы.
Сөз соңында Төлеутай Рахымбеков шаруаларға арналған аталмыш мемлекеттік бағдарлама аясында диқандарға қомақты қаржылай көмек көрсетілетіндігін атап өтті.
«Осыдан 10-15 жыл бұрын жалпы ауыл шаруашылығына арналған субсидиялар көлемі 4-5 млрд теңге болатын. Ал бұл субсидияның көлемі 188 млрд теңгеге жетті. Жоба – 200 млрд теңгені құрайды. Мемлекеттің қолдауы – өте қомақты. Бұрынғы «Агробизнес-2020» бағдарламасында көбінесе ірі кәсіпорындарды, ірі ауыл шаруашылық тауар өндірушілерге көмек көрсетілетін. Ал қазіргі жаңа мемлекеттік бағдарламасына сәйкес көмек алушылардың саны 7,5 есеге өсуі керек. Бұрын осы көмекті 67 мың азамат алса, оның санын 2021 жылға дейін 500 мыңға дейін жеткізуді жоспарлап отырмыз», — деп түйіндеді сөзін вице-министр.