Су ресурстары және ирригация министрлігінің ресми өкілі Мөлдір Әбдуалиева еліміздегі ірі су қоймаларының толуына қатысты кейінгі деректерді жариялады.
Осы сағатқа Ақмола облысында екі ірі су қоймасының орташа су жинауы – 99 пайыз. Мұнда су тасқынының белсенді кезеңі өтіп, салалары тұрақтанды. Жабай өзенінің реттелмейтін ағыны артуда. Сондықтан Ақмола облысының Атбасар елді мекенінде су тасқыны бар. Солтүстік Қазақстан облысында 2 ірі су қоймасы 100%-ке толы, су тасқыны жалғасуда. Петропавл қаласы шегіндегі Есіл өзенінің деңгейі – 1 176 см, бір тәулікте ол 138 см-ге көтерілді. Жағдай күрделі. Мамандар су өткізу іс-шараларын атқарып жатыр, — деді ресми өкіл Орталық коммуникациялар қызметіндегі брифингіде.
Оның дерегінше, Ақтөбе облысында екі ірі су қоймасының орташа су жинау көрсеткіші – 97%. Өңірдегі жағдай тұрақты. Шығыс Қазақстан облысында екі ірі су қоймасы бойынша орташа су жинау көрсеткіші – 79%.
Абай облысында Шүлбі су қоймасы 95%-ке толды. Аймақта су тасқыны басталды. Шүлбі су қоймасына бүйірлік ағындардың ұлғаюына байланысты табиғат қорғау іс-шаралары аясында су жіберіліп жатыр. Жалпы, Ертіс каскадының су қоймалары штаттық режимде жұмыс істеп жатыр. Батыс Қазақстан облысындағы төрт ірі су қоймасы 73%-ке толы. Ириклі су қоймасынан жіберілген су әлі Қазақстан шекарасына жеткен жоқ. Оған қатысты болжам өзгермеді. Бұл су 16-17 сәуірде келеді деп күтілуде. Қарағанды облысында 3 ірі су қоймасы 99%-ке толы. Өңірде су тасқынының қауіпті кезеңі өтті. Жағдай тұрақты. Қостанай облысында екі ірі су қоймасының орташа су жинау көрсеткіші – 92%. Мұнда да су тасқынының белсенді кезеңі өтті. Қаратомар су қоймасы транзиттік режимде жұмысын жалғастырып жатыр, — деді Мөлдір Әбдуалиева.
