Алматы әуежайының жаңа халықаралық терминалы биыл маусым айында ашылады деп жоспарланып отыр. Бұл туралы премьер-министр Әлихан Смайылов пен TAV Airports Holding компаниясының президенті Серкан Каптан өткен кездесуінде белгілі болды.
Бұл туралы үкіметтің баспасөз қызметі хабарлады.
Тараптар Алматы әуежайының жаңа халықаралық терминалының құрылысын және елімізде өзге де инфрақұрылымдық жобаларды іске асыру мәселелерін талқылады.
Кездесу барысында үкімет басшысы еліміздің көлік-логистика әлеуетін арттыруға үлкен көңіл бөлетіні аталып өтті. Сондықтан Алматыда жаңа халықаралық терминал құрылысы сынды үлкен жобаны жүзеге асыру стартегиялық маңызға ие.
Оның ашылуы жолаушылар ағынын арттырып, ұшу географиясын кеңейтеді және мегаполис тұрғындары мен қонақтарына сапалы қызмет пен жайлылықтың жоғары деңгейін қамтамасыз етеді деп күтеміз, — деді Әлихан Смайылов.
TAV Airports Holding басшысының айтуынша, бүгінде құрылыс жұмыстары 87%-ке аяқталған. Жаңа терминал биылғы маусымда ашылады деп жоспарланып отыр.
Жалпы былтыр Алматы әуежайы жолаушылар ағынының рекордтық деңгейін тіркеді. Қолданыстағы терминал тек ішкі рейстерге ғана пайдаланылады. Бұл ретте екі терминалдың әлеуеті жылына 14 миллион жолаушыға жетеді. Әуе айлағы арқылы жүк тасымалы көлемін 100 мың тоннаға дейін арттыру жоспарланған, — делінген хабарламада.
Премьер-министр Алматы әуежайы теміржол және автомобиль тасымалын қоса алғанда, толыққанды мультимодальды көлік-логистика хабы ретінде дамуы керек екенін атап өтті. Инвестор алдағы жоспарларында мұны ескеруге тиіс.