Алматыда 1 000-нан астам жол жұмысшысы мен 425 техника қар тазалауға жұмылдырылды. Бұл туралы коммуналдық инфрақұрылымды дамыту басқармасы хабарлады.
«Қазгидромет» РМК мәліметінше, 16 қаңтар күні сағат 22.30-дан 17 қаңтар күні таңғы сағат 08.30-ға дейін Алматы қаласында 19 сантиметр қар жауды. Қар тазалау жұмыстары тәулік бойы жүргізіледі.
Түнде 421 бірлік арнайы техника жұмыс істеді, таңертең 425 бірлік арнайы техника жұмылдырылды, оның ішінде 146 құм таратқыш және 1 143 жол жұмысшысы. Сағат түнгі 02.30-дан бастап жол полициясының патрульдік машиналарының еріп жүруімен 13 колонна қар күреумен айналысты. Таңғы сағат 05.00-ден бастап 168 бірлік шағын көлемді жинау техникасының күшімен тротуарлар қардан тазартылуда, бұл жұмыс қазіргі уақытқа дейін жалғасуда. Аялдамаларды, жер үсті өткелдерінің тұрақ «қалталарын», әлеуметтік маңызы бар объектілерге өтетін жолдарды тазарту жұмыстары күшейтілді, — делінген хабарламада.
Қалалық трафикке жүктемені азайту мақсатында сағат 07.00-ден бастап техникаға жанармай құю және құм таратқыштарды көктайғаққа қарсы материалмен толтыру жүзеге асырылады. Сағат 10.30-дан бастап жолдардың жүріс бөліктерін қардан тазартудың жаңа циклі және жиналған қарды сыртқы полигондарға шығару басталады.
