Президентке Қостанай облысының былтырғы әлеуметтік-экономикалық дамуы туралы есеп берілді. Бұл туралы Ақорданың баспасөз қызметі хабарлады.
Құмар Ақсақалов 2023 жылдың қорытындысы бойынша өңірдің негізгі макроэкономикалық өсім көрсеткіштерінде оң динамика байқалатынын баяндады. Атап айтқанда, өңдеу өнеркәсібі 11%, құрылыс саласы 7%, негізгі капиталға салынған инвестиция 8,5%, көлік тасымалы 3%, тұрғын үйді пайдалануға беру көлемі 5% өскен.
Жалпы өңірлік өнімдегі өнеркәсіп саласының үлесі 30%-тен асты. Әсіресе, жергілікті машина жасау кәсіпорнында шығарылатын автокөлік модельдерінің қатары көбейіп келеді. «СарыарқаАвтоӨнеркәсіп» ЖШС жылына 30 мың Chevrolet Оnix автокөлігін құрастыру үшін құны 23 миллиард теңге болатын инвестициялық жобаны жүзеге асыра бастады. Нәтижесінде 400 жаңа жұмыс орны ашылмақ.
Сонымен қатар KIA машина жасау зауытының құрылысы басталды. Кореялық автоконцернмен бірлескен бұл жобаға 90 миллиард теңге көлемінде инвестиция тартылған. Аталған жоба аясында жылына 70 мың көлік шығарылады және 1,5 мың жаңа жұмыс орны ашылады деп жоспарланып отыр. Бұған қоса, автокөліктің қосалқы бөлшектерін өндіретін локализациялық орталық салу көзделген. Жоба құны – 13 миллиард теңге.
Былтыр елдімекендерді сумен қамтамасыз ету үшін жалпы құны 21 миллиард теңге болатын 69 жоба қолға алынған. Бүгінде 37 жоба толықтай жүзеге асырылды. Нәтижесінде аймақ тұрғындарын сумен қамту көрсеткіші 86,6%-ке дейін жеткен және қазіргі уақытта 347 ауыл таза ауызсу тұтынып отыр.
Бүгінде облыста жалпы сыйымдылығы 1 980 оқушыға арналған үш мектептің құрылысы жүргізіліп жатыр.
Облыс орталығында «IQostanay» оқушылар сарайы ашылды. Орталықта 1 300 баланың жан-жақты дамуына жағдай жасалған. Бұған қоса, 2025 жылға дейін 7 500 орындық тоғыз заманауи мектеп салу жоспарланған. Оның ішінде сегіз білім ордасы «Жайлы мектеп» жобасы аясында пайдалануға беріледі.
Құмар Ақсақалов мемлекет басшысының тапсырмасына сәйкес қазіргі кезде Ақтөбе облысынан Қостанай қаласына дейін магистральды газ құбырын тарту үшін техникалық-экономикалық негіздеме әзірленіп жатқанын жеткізді. Бұл жоба Қостанай өңірінің елдімекендерін көгілдір отынмен қамтамасыз етіп қана қоймай, ірі инвестициялық жобалардың іске асырылуына қолайлы жағдай жасайды.
Газбен қамтамасыз ету көлемін ұлғайту бірнеше жобаны жүзеге асыруға, соның ішінде ыстық күйінде брикеттелген темір шығаратын және болат балқытатын зауыттар салуға мүмкіндік береді. Бұл өңірдің экономикасын жандандырып, жаңа жұмыс орындары ашылады.
Кездесу соңында мемлекет басшысы Қасым-Жомарт Тоқаев облыс әкіміне жылыту маусымын қалыпты режимде өткізу, өңірді газбен қамтамасыз ету жобасын уақытылы жүзеге асыру мәселелерін үкіметпен бірге айрықша бақылауға алуды, сонымен қатар көктемгі егіс науқанына әзірлікті пысықтауды тапсырды.
