Ұлттық статистика бюросының мәліметінше, 2023 жылғы қаңтар-қыркүйек аралығында елімізге 834,9 мың шетелдік турист саяхаттаған. Бұл – 2022 жылғы көрсеткішке қарағанда 225 мың адамға көп.
Бұл туралы туризм және спорт министрлігінің баспасөз қызметі хабарлады.
Өсім 2022 жылдың сәйкес кезеңімен салыстырғанда 37%-ке артқан. 2022 жылы елімізге 609,8 мың шетелдік келген. Статистика бойынша, елімізге саяхаттайтын шетелдік туристердің географиясы жыл санап артып келеді. Мәселен, Қазақстанға жақын көршілерімізден бөлек, мұхиттың арғы бетіндегі мемлекеттердің де саяхташылары көптеп келе бастады. Осы орайда назарларыңызға 2023 жылғы қаңтар-қыркүйек аралығында елімізге саяхаттаған ТОП-5 елдің туристер санын ұсынамыз.
2023 жылдың алғашқы тоғыз айында еліміз бойынша ең көп саяхатшы Ресей Федерациясынан келген. Былтырғы қаңтар-қыркүйек аралығында Қазақстанға 356 850 мың ресейлік саяхаттаған.
Екінші орынды Қытай туристері иеленді. Шығыстағы көршімізден елімізге 75 131 адамның табаны тиген.
Ал үшінші сатыға Түркия туристері тұрақтады. Анадолыдан 41 134 турист келген. Сонымен қатар үздік бестіктің қатарына Үндістан (34 757) және АҚШ (28 160) саяхатшылары енді.
Жыл сайын шетелдік туристердің Қазақстанға деген қызығушылығы арта бастағанын байқап отырмыз. Мәселен, 2022 жылы елімізге 900 мыңнан аса шетелдік саяхатшы, ал өткен жылдың тоғыз айында 800 мыңнан аса шетелдік қонақ келген. Биыл бұл көрсеткіш бұдан да көбейе түседі деген сенімдеміз. Өйткені елімізде шетелдіктерді таңғалдыратын, сұлулығымен өзіне тартатын, көрсе көз тоятын көрікті жерлер, табиғат сый етіп берген сұлу мекендер аз емес. Сонымен қатар министрлік байтақ жерімізге табаны тиген әрбір саяхатшыға ұмытылмас әсер қалдыру үшін жұмыс істеп жатыр, — деді туризм және спорт министрінің орынбасары Ержан Еркінбаев.
